កម្ពុជាប្រមូលចំណូលបានជាង៤៧លានដុល្លារ ពីការលក់សំបុត្រដល់ភ្ញៀវទេសចរបរទេសចូលទស្សនារមណីយដ្ឋានអង្គរ ក្នុងឆ្នាំ២០២៤

របាយការណ៍គ្រឹះស្ថានអង្គរ បានឱ្យដឹងថា រយៈពេលមួយឆ្នាំ២០២៤ ភ្ញៀវទេសចរបរទេស អញ្ជើញចូលទស្សនារមណីយដ្ឋានអង្គរ មានចំនួន ១ ០២៣ ៦៨៨ នាក់ ដោយរកចំណូលបានចំនួន ៤៧ ៨២៦ ៩៨១ ដុល្លារអាមេរិក។

ចំនួនភ្ញៀវទេសចរបានទិញបណ្ណចូលទស្សនារមណីយដ្ឋានអង្គរ ក្នុងឆ្នាំ២០២៤នេះ មានការកើនឡើងជាង ២៨ភាគរយ បើធៀបនឹងឆ្នាំ២០២៣ មានតែ ៧៩៨ ០៦៩នាក់ប៉ុណ្ណោះ។

ដោយឡែកបើគិតត្រឹមតែក្នុងខែធ្នូ ឆ្នាំ២០២៤ ចំនួនភ្ញៀវទេសចរបរទេស មានចំនួន១២៥ ៣៤៩នាក់ កើនឡើង២៧,៨១% ទទួលបានចំណូល ៥ ៩១៨ ១៤៨ដុល្លារ កើនឡើង២៧,២១% បើធៀបរយៈដូចគ្នានៅឆ្នាំ២០២៣។

សូមជម្រាបជូនថា រយៈពេល១២ខែ ឆ្នាំ២០២៣ ចំនួនភ្ញៀវទេសចរបរទេសបានទិញបណ្ណ ចូលទស្សនារមណីយដ្ឋានអង្គរមានចំនួន ៧៩៨ ០៦៩នាក់ រកចំណូលបានជាង ៣៧ លានដុល្លារអាម៉េរិក៕