ក្រុមការងារនាយកដ្ឋានដឹកជញ្ជូនសាធារណៈក្រុង នៃក្រសួងសាធារណការ និងដឹកជញ្ជូន បានចុះសិក្សាកំណត់យកខ្សែរត់ចំនួន ៣ខ្សែ និងស្ថានីយរង់ចាំចំនួន ៣៣ទីតាំង ដើម្បីរៀបចំប្រព័ន្ធដឹកជញ្ជូនសាធារណៈតាមរថយន្ដក្រុងអគ្គិសនី ក្នុងក្រុងសៀមរាប។
នេះបើយោងតាមសិក្ខាសាលាបញ្ចប់គម្រោង នៃការសិក្សាប្រព័ន្ធដឹកជញ្ជូនសាធារណៈតាមរថយន្ដក្រុងអគ្គិសនី ក្នុងក្រុងសៀមរាប ដែលធ្វើឡើងកាលពីពេលថ្មីៗនេះ។
សិក្ខាសាលានេះ បានធ្វើឡើងក្រោមវត្តមានលោក គង់ សុផល អគ្គនាយករង នៃអគ្គនាយកដ្ឋានដឹកជញ្ជូនផ្លូវគោក ជាមួយលោក លី សារី អភិបាលរង នៃគណៈអភិបាលខេត្តសៀមរាប លោក ប៉ែន វិបុលសក្ដិ ប្រធាននាយកដ្ឋានអភិវឌ្ឍន៍គម្រោង ក្រសួងសេដ្ឋកិច្ច និងហិរញ្ញវត្ថុ និងលោកស្រី Lara Arjan អ្នកឯកទេសអភិវឌ្ឍន៍ទីក្រុងជាន់ខ្ពស់របស់ ADB។
សិក្ខាសាលានេះ មានការចូលរួមពីលោកប្រធាននាយកដ្ឋាន អនុប្រធាននាយកដ្ឋាន អនុការិយាល័យ នៃនាយកដ្ឋានដឹកជញ្ជូនសាធារណៈក្រុង ក្រសួងសាធារណការ និងដឹកជញ្ជូន តំណាងក្រសួងសេដ្ឋកិច្ច និងហិរញ្ញវត្ថុ និង លោក លោកស្រី ប្រធានអនុប្រធាន មន្ទីរ-អង្គភាពពាក់ព័ន្ធ។
គម្រោងសិក្សារៀបចំប្រព័ន្ធដឹកជញ្ជូនសាធារណៈតាមរថយន្ដក្រុងអគ្គិសនីនៅក្នុងក្រុងសៀមរាប ចាប់ផ្ដើមសិក្សាបុរេសមិទ្ធិលទ្ធភាពដោយអគ្គនាយកដ្ឋានដឹកជញ្ជូនផ្លូវគោក សហការជាមួយវិទ្យាសា្ថនអភិវឌ្ឍបៃតង (GGGI) និងទទួលបានការសម្របសម្រួល និងគាំទ្រពីរដ្ឋបាលខេត្តសៀមរាប និងអាជ្ញាធរពាក់ព័ន្ធក្នុងខេត្ត ក្នុងឆ្នាំ២០២១។
បើតាមអ្នកជំនាញនៅក្នុងសិក្ខាសាលានោះ បានឱ្យដឹងថា ក្រុមការងារនាយកដ្ឋានដឹកជញ្ជូនសាធារណៈក្រុង នៃក្រសួងសាធារណការ និងដឹកជញ្ជូន បានចុះសិក្សាកំណត់យកខ្សែរត់ចំនួន ៣ខ្សែ និងស្ថានីយរង់ចាំចំនួន ៣៣ទីតាំង។
ខ្សែរត់ចំនួន ៣នោះ រួមមាន ខ្សែរត់ទី១ ៖ ផ្លូវជាតិលេខ ៦ ទៅ-មក ចាប់ពីរង្វង់មូលព្រះបាទជ័យវរ្ម័នទី៧ (វិទ្យាល័យសម្ដេចឪ) រហូតដល់រង្វង់មូលផ្ការំដួល (ស្វាយធំ)ស្រុកប្រាសាទបាគង។ ខ្សែរត់ទី២ ៖ ផ្លូវក្រវាត់ក្រុង ចាប់ពីស្ដុបចុងកៅស៊ូ រត់តាមបណ្ដោយវិថីឈ្នះៗ (ផ្លូវវាងក្រុង ) រហូតដល់ស្ដុបឈ្នះៗ (ស្ដុបសាលាគ្រួស) និងបន្ដតាមវិថីសម្ដេចក្រឡាហោម ស ខេង រហូតដល់រុក្ខវិថីព្រះសីហនុ និងបត់តាមស្ដុបគន្ធបុប្ផា មកតាមបណ្ដោយវិថីសម្ដេចវិបុលបញ្ញាសុខ អាន រហូតដល់វង្វង់មូលព្រៃគុយ បន្ដឆ្ពោះទៅរង្វង់មូលផ្ការំដួល និងបន្ដតាមផ្លូវជាតិលេខ៦ រហូតដល់ស្ដុបចុងកៅស៊ូវិញ។ និងខ្សែរត់ទី៣ ៖ ផ្លូវស្របស្ទឹងសៀមរាប ពីតំបន់ចុងឃ្នៀស រហូតដល់បុរីប្រឹមប្រិយ៍៕ អត្ថបទ៖ហ្សាលីន
