ក្រុមហ៊ុនសំបកកង់ខ្មែរម៉ាកសៃលុន (Sailun Tire Cambodia) បានជូនដំណឹងដ៏ពិសេសមួយចំពោះអតិថិជនថ្មី-ចាស់របស់ខ្លួនដែលតែងតែគាំទ្រផលិតផលសំបកកង់ខ្មែរម៉ាកសៃលុន ឲ្យជ្រាបថា ក្រុមហ៊ុនមានកម្មវិធីលក់បញ្ចុះតម្លៃពិសេសនូវសំបកកង់រថយន្តចំនួន២៥ ០០០ គ្រាប់ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរខាងមុខនេះ។ ការផ្តល់ជូនចាប់ពីថ្ងៃទី ១ ដល់ថ្ងៃទី ២០ ខែមេសាឆ្នាំ ២០២៥ ។
បើតាមការបញ្ជាក់ពីលោក គឹន ឧត្តមមុនីស៊ីណាត នាយកប្រតិបត្តិនៃក្រុមហ៊ុន PIC Tire Co.,Ltd (ភីអាយសុី ថាយអ៊ើ ខូអិលធីឌី) ដែលជាក្រុមហ៊ុនទទួលសិទិ្ធចែកចាយផ្តាច់មុខនូវផលិតផលសំបកកង់ឡានផលិតក្នុងស្រុកមួយនេះប្រាប់សារព័ត៌មាន Oknha News ថា ៖ “ក្រុមហ៊ុនតែងតែគិតគូរដល់សុវត្ថិភាពអ្នកបើកបរលើដងផ្លូវ និងជាការលើកទឹកចិត្តដល់បងប្អូនប្រជាពលរដ្ឋដែលចង់ប្រើកង់ខ្មែរតែខ្វះខាតថវិកានឹងងាកមកប្រើប្រាស់ផលិតផលដែលមានគុណភាពខ្ពស់ និងជាផលិតផលសំបកកង់រថយន្តផលិតឡើងពីជ័រកៅស៊ូខ្មែរលើទឹកដីខ្មែរដំបូងគេនៅកម្ពុជា។”
ទន្ទឹមគ្នានេះ លោក ក៏សូមអំពាវនាវដល់បងប្អូនប្រជាពលរដ្ឋ និងក្រុមហ៊ុនធំៗក្នុងស្រុក សូមបន្ដគាំទ្រសំបកកង់ឡានមួយនេះបន្តទៀត ដើម្បីរួមចំណែកលើកកម្ពស់ជីវភាពប្រជាពលរដ្ឋខ្មែរក្នុងស្រុក ក៏ដូចជាជម្រុញសកម្មភាពសេដ្ឋកិច្ចជាតិឱ្យកាន់តែរីកចម្រើន។
លោក ក៏បានបន្ថែមទៀតថា ប្រសិនបើការបញ្ជារទិញកង់ឡានកាន់តែមានសន្ទុះកើនឡើងច្រើន រោងចក្រនឹងពិចារណាបង្កើនការទិញជ័រកៅស៊ូ ដែលជាតម្រូវការវត្ថុធាតុដើមក្នុងស្រុកលើសពី ១០ម៉ឺនតោនក្នុងមួយឆ្នាំជាក់ជាមិនខាន និងបង្កើតការងារដល់ប្រជាជនបន្ថែមទៀតផងដែរ។ សូមជម្រាបជូនថា រោងចក្រផលិតសំបកកង់ទំនើបនិងដំបូងគេបំផុតនៅកម្ពុជាចែកចាយផ្ដាច់មុខដោយក្រុមហ៊ុន PIC TIRE Co., Ltd. សម្រេចបានកំណត់ត្រាថ្មីដែលជាការនាំចេញសំបកកង់រថយន្តប្រមាណជា ២២,៦៥០,០០០គ្រាប់ ដែលស្មើនឹង ១៨០កុងតឺន័រក្នុង១ថ្ងៃនាំអោយសៃលុនជាប់លេខ១០ក្នុងសកលលោក៕
