ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ និងសមាគមជប៉ុន-កម្ពុជា បានជួបពិភាក្សាគ្នាដើម្បីពង្រឹងកិច្ចសហប្រតិបត្តិការទ្វេភាគីលើវិស័យកសិកម្មរវាងប្រទេសទាំងពីរឱ្យកាន់តែរឹងមាំ ។
នេះបើតាមរយៈជំនួបពិភាក្សារវាងលោក ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោក តាកាហាស៊ី ហ្វូមីអាគី (Takahashi Fumiaki) ប្រធានសមាគមជប៉ុន-កម្ពុជា កាលពីថ្ងៃទី០១ ខែមេសា ឆ្នាំ២០២៥ ផ្តោតទៅលើគម្រោងវិនិយោគការកែច្នៃគ្រឿងសម្អាង កែច្នៃខ្នុរទៅជាទឹកស៊ីរ៉ូ និងការធ្វើវារីវប្បកម្មត្រីទីឡាព្យា សំដៅជំរុញការកែច្នៃក្នុងស្រុក និងនាំចេញទៅកាន់ទីផ្សារអន្តរជាតិ។
លោក ប្រាក់ ដាវីដ បានលើកឡើងថា កម្ពុជាមានកសិផលសក្តានុពលជាច្រើនដូចជា អង្ករប្រណីត ម្រេច ស្ករត្នោត និងស្វាយចន្ទី ដែលមានគុណភាពខ្ពស់ រសជាតិឆ្ងាញ់។ដូច្នេះ ភាគីជប៉ុនអាចពិចារណាក្នុងការវិនិយោគកែច្នៃជាមួយនឹងតម្លៃបន្ថែមខ្ពស់ ហើយក្រសួងនឹងជួយគាំទ្រផ្នែកបច្ចេកទេស ប្រការសំខាន់ត្រូវចេះបង្កើតស្លាកយីហោល្អ និងមានការធ្វើទីផ្សារត្រឹមត្រូវ។
ជាមួយគ្នានោះ ភាគីទាំងពីរបានឯកភាពពង្រឹងកិច្ចសហប្រតិបត្តិការរួមគ្នាលើវិស័យកសិកម្ម ។ដោយលោករដ្ឋលេខាធិការក្រសួងកសិកម្ម ក៏បានលើកឡើងពីកម្មវិធីវេទិកានិងពិព័រណ៍កសិកម្មកម្ពុជា ហើយបានអំពាវនាវដល់គណៈប្រតិភូជប៉ុនឲ្យចូលរួមព្រឹត្តិការណ៍នេះ ដើម្បីស្វែងយល់និងស្វែងរកនូវសក្ដានុពលវិនិយោគបន្ថែមទៀតផងដែរ៕
