ភ្នំពេញ៖ ក្រុមហ៊ុន Smart Eden មានបំណងពង្រីកការនាំចេញផលិតផលកម្ពុជាពី១០ទៅ១៥មុខ បន្ថែមទៀតរួមមានអង្ករ ម្រេច ស្ករត្នោត ក្នុងឆ្នាំ២០២៥ ទៅទីផ្សារប្រទេសបារាំង។
គួរជម្រាបថា ក្រុមហ៊ុនបាននាំចេញគ្រាប់ស្វាយចន្ទីនិងដំណាប់ស្វាយពីកម្ពុជាតាំងពីឆ្នាំ២០២៤ ហើយទទួលបានការគាំទ្រច្រើនពីអតិថិជនក្នុងប្រទេសបារាំង។ក្រុមហ៊ុនចែកចាយផលិតផលដ៏ធំបច្ចុប្បន្នមាន បណ្តាញលក់ជាង៦.០០០ ទីតាំងនៅទូទាំងប្រទេសបារាំង។
ដើម្បីពិភាក្សាអំពីកិច្ចសហប្រតិបត្តិការក្នុងការផលិត និងការនាំចេញផលិតផលកម្ពុជាទៅកាន់ទីផ្សារបារាំងនេះ គណៈប្រតិភូក្រុមហ៊ុន Smart Eden ដឹកនាំដោយនាយកប្រតិបត្តិ លោក Laurent Strauch និងអ្នកឧកញ៉ា ហ៊ុន ឡាក់ នៅថ្ងៃទី១ ខែមេសា ឆ្នាំ២០២៥ បានជួបជាមួយលោក ហែម វណ្ណឌី រដ្ឋ មន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
នៅក្នុងជំនួបនេះ លោក Laurent Strauch បានលើកឡើងថា ក្រុមហ៊ុន Smart Eden បាននាំចេញគ្រាប់ស្វាយចន្ទី និងដំណាប់ស្វាយពីកម្ពុជាតាំងពីឆ្នាំ២០២៤ ហើយទទួលបានការគាំទ្រច្រើនពីអតិថិជនក្នុងប្រទេសបារាំង។ លោកបានជម្រាបជូនអំពីដំណើរការរបស់ Smart Eden ដែលជាក្រុមហ៊ុនចែកចាយផលិតផលដ៏ធំ បច្ចុប្បន្នមានបណ្តាញលក់ជាង ៦.០០០ ទីតាំងនៅទូទាំងប្រទេសបារាំង។
លោក Strauch បានបញ្ជាក់ថា៖ “យើងមានបំណងពង្រីកការនាំចេញផលិតផលកម្ពុជា ពី ១០ ទៅ ១៥ មុខ ក្នុងឆ្នាំ២០២៥ នេះ ដែលរួមមានទាំងអង្ករ ម្រេច ស្ករត្នោត និងធ្យូងអនាម័យ។ យើងក៏គ្រោងផលិតបឺរពីគ្រាប់ស្វាយចន្ទី ដើម្បីនាំចេញទៅបារាំងផងដែរ។”
ទន្ទឹមនឹងនោះ លោក Strauch បានបង្ហាញពីចំណាប់អារម្មណ៍ ក្នុងការយកកម្ពុជាធ្វើជាទីតាំងយុទ្ធសាស្ត្រសម្រាប់តំបន់ ដើម្បីចែកចាយផលិតផលបារាំងដែលមានគុណភាព។
លោក ហែម វណ្ណឌី បានអបអរក្រុមហ៊ុន Smart Eden ចំពោះជោគជ័យនៃការនាំចេញគ្រាប់ស្វាយចន្ទី និងដំណាប់ស្វាយពីកម្ពុជាកន្លងមក។ ឯកឧត្តមបានលើកឡើងថា៖ “រាជរដ្ឋាភិបាលកម្ពុជាផ្តល់អាទិភាពខ្ពស់ដល់ការអភិវឌ្ឍវិស័យស្វាយចន្ទី ជាទំនិញយុទ្ធសាស្ត្រ។ យើងចង់ប្រែក្លាយកម្ពុជាទៅជាប្រទេសផ្គត់ផ្គង់ផលិតផលស្វាយចន្ទីធំបំផុតមួយសម្រាប់ពិភពលោក។”
លោកក៏បានលើកឡើងពីសារៈសំខាន់នៃការប្រមូលផ្តុំក្នុងខ្សែច្រវាក់ផ្គត់ផ្គង់ ដែលជំរុញដោយទីផ្សារ ដើម្បីទាញយកឧត្តមភាពនៃសេដ្ឋកិច្ចមាត្រដ្ឋាន និងបំពេញតាមតម្រូវការទីផ្សារ។
លោករដ្ឋមន្ត្រីក៏បានជម្រាបជូនគណៈប្រតិភូអំពីកិច្ចខិតខំប្រឹងប្រែងកែលម្អហេដ្ឋារចនាសម្ព័ន្ធគុណភាពជាតិរបស់កម្ពុជា រួមទាំងសេវាមន្ទីរពិសោធន៍ ស្តង់ដារជាតិ និងការស្រាវជ្រាវ និងអភិវឌ្ឍន៍ ពិសេសក្នុងវិស័យម្ហូបអាហារ សំដៅលើកកម្ពស់ស្តង់ដារផលិតផល និងជំរុញការនាំចេញរបស់កម្ពុជា។
លោកបានបន្ថែមថា៖ “ក្រសួងគាំទ្រក្រុមហ៊ុនក្នុងការផលិតបឺរពីគ្រាប់ស្វាយចន្ទី ហើយយើងលើកទឹកចិត្តក្រុមហ៊ុនឱ្យសិក្សាផលិតផលសក្តានុពលផ្សេងៗទៀតរបស់កម្ពុជា ដោយសហការជាមួយក្រុមការងារ របស់ក្រសួង និងដៃគូ ដូចជាសហគ្រិនខ្មែរជាដើម។”
