ឯកឧត្តម ជា លីសែ អនុរដ្ឋលេខាធិការក្រសួងព័ត៌មាន នៅថ្ងៃទី២ ខែមេសា ឆ្នាំ២០២៥នេះ បានអំពាវនាវដល់យុវជនពិចារណាក្នុងការប្រើប្រាស់ផ្ទិល ត្រឡោក ជាមួយពាង ឬធុងទឹក ជាអត្តសញ្ញាណខ្មែរ ជំនួសកាំភ្លើងបាញ់ទឹកដែលជាផលិតផលនាំចូលពីបរទេស ក្នុងថ្ងៃបុណ្យចូលឆ្នាំថ្មីប្រពៃណីជាតិខ្មែរ ខាងមុខនេះ។
នៅលើបណ្តាញសង្គមហ្វេសប៊ុក នារសៀលនេះ ឯកឧត្តម ជា លីសែ បានលើកឡើងថា សម្រាប់ពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងខិតជិតមកនាពេលដ៏ខ្លីខាងមុខនេះ សម្រាប់ការលេងជះទឹក លោកសូមអំពាវនាវដល់យុវជន បងប្អូនមិត្តភក្ដពិចារណាក្នុងការប្រើប្រាស់ផ្ទិល ត្រឡោក ជាមួយពាង ឬធុងទឹក ជាអត្តសញ្ញាណខ្មែរ ជំនួសកាំភ្លើងបាញ់ទឹកដែលជាផលិតផលនាំចូលពីបរទេស។ សូមអញ្ជើញរីករាយពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកក្នុងពេលដ៏ឆាប់ៗនេះ។
គួរកត់សម្គាល់ថា ការលេងបាញ់ទឹក និងប៉ាតម្សៅ ដែលមិនមែនជាប្រពៃណីវប្បធម៌ខ្មែរ តែបែរជាពេញនិយមខ្លាំង ពីស្រទាប់យុវជនខ្មែរក្នុងស្រុក បើទោះបីជាក្រសួងអប់រំ អាជ្ញារាជធានីភ្នំពេញ និងអាជ្ញាធរខេត្តមួយចំនួន បានចេញបម្រាម មិនឲ្យលេងបាញ់ទឹកនិងប៉ាតម្សៅនៅតាមគ្រឹះស្ថានសិក្សាសាធារណៈ និងឯកជន រួមទាំងនៅតាមទីកន្លែងកម្សាន្តនានា នៅក្នុងឱកាសបុណ្យចូលឆ្នាំខ្មែរនេះក៏ដោយ។
ទោះបីការបាញ់ទឹកខ្លាំងៗ តាមដងផ្លូវដាក់គ្នាមិនត្រូវបានអនុញ្ញាត កន្លងមកកម្មវិធីសង្ក្រាន្តថ្នាក់ខេត្ត-រាជធានី មានរៀបចំកន្លែងលេងជះទឹក នៅទីតាំងសមរម្យមួយដែលគេរៀបចំ និងឲ្យឈ្មោះថា “តំបន់ត្រជាក់ចិត្ត” ធ្វើឲ្យបងប្អូនប្រជាពលរដ្ឋខ្មែរអាចចូលរួមលេងទឹកបានដោយរីករាយ និងគ្មានហានិភ័យ ដូចការលេងគប់ទឹក បាញ់ទឹកតាមដងផ្លូវ ដែលផ្ទុយនឹងបំរាមរបស់អាជ្ញាធរនោះទេ៕
