លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(ក.អ.ក.) បានជំរុញនិងលើកទឹកចិត្តទៅកាន់សមាគមជប៉ុន-កម្ពុជា( Japan-Cambodia Association – JCA) ឱ្យជួយជំរុញវិនិយោគដោយផ្ទាល់ពីជប៉ុនមកកាន់កម្ពុជាឱ្យកាន់តែច្រើនថែមទៀត ដើម្បីជំរុញកំណើនសេដ្ឋកិច្ច។
ឧបនាយករដ្ឋមន្ត្រី ស៊ុន ចាន់ថុល ស្នើបែបនេះ នៅក្នុងជំនួបរវាងលោកជាមួយ លោក TAKAHASHI Fumiaki ប្រធានសមាគមជប៉ុន-កម្ពុជា នារសៀលថ្ងៃទី២ ខែមេសា ឆ្នាំ២០២៥។
នាឱកាសនោះ លោក ស៊ុន ចាន់ថុល បានស្វាគមន៍ វត្តមាន ប្រធានសមាគមជប៉ុនមកកាន់កម្ពុជា ដែលកាលពីមុន លោកធ្លាប់បានបំពេញតួនាទីជាឯកអគ្គរាជទូតវិសាមញ្ញនិងពេញសមត្ថភាព នៃប្រទេសជប៉ុន ប្រចាំនៅកម្ពុជាផងដែរ។ ទន្ទឹមនឹងនេះ លោក ស៊ុន ចាន់ថុល ក៏បានថ្លែងអរគុណចំពោះរដ្ឋាភិបាល និងប្រជាជនជប៉ុន ដែលតែងតែផ្តល់នូវជំនួយគាំទ្រកម្ពុជាក្នុងគ្រប់រូបភាព ទាំងផ្នែករឹង និងផ្នែកទន់។
លោកសង្ឃឹមថា ប្រធានJCA នឹងជួយជំរុញការផ្សព្វផ្សាយអំពីបច្ចុប្បន្នភាពវឌ្ឍនភាពថ្មីៗ និងបរិយាកាសវិនិយោគរបស់កម្ពុជាទៅកាន់សហគមន៍ធុរកិច្ចនៃប្រទេសជប៉ុន ដើម្បីជាការទាក់ទាញ និងជំរុញកំណើនការបោះទុនវិនិយោគដោយផ្ទាល់ពីជប៉ុន នៅក្នុងប្រទេសកម្ពុជាមួយកម្រិតបន្ថែមទៀត។
ជាការឆ្លើយតប លោកប្រធានសមាគមជប៉ុន-កម្ពុជា បានបង្ហាញក្តីរីករាយចំពោះបដិសណ្ឋារកិច្ចរបស់កម្ពុជា។ ក្នុងការត្រឡប់មកកម្ពុជានាឱកាសនេះ លោក ក៏បានកត់សម្គាល់ឃើញនូវភាពរីកចម្រើនថ្មីៗ ដែលគួរជាទីកោតសរសើរ។ ជាមួយគ្នានេះ តំណាងក្រុមហ៊ុនជប៉ុនដែលមានវត្តមានអមដំណើរលោកប្រធានសមាគម ក៏បានធ្វើបទបង្ហាញអំពីក្រុមហ៊ុនរបស់ខ្លួន ដោយលើកយកជំនាញឯកទេស, ព័ត៌មានផលិតផល, និងបច្ចេកវិទ្យាថ្មីៗ មកគោរពជម្រាបជូន លោកឧបនាយករដ្ឋមន្ត្រី ស៊ុន ចាន់ថុលផងដែរ។
បើតាមក្រុមប្រឹក្សាអភិវឌ្ឍន៍កម្ពុជា បានឱ្យដឹងថា ប្រទេសជប៉ុនឈរនៅលំដាប់ទី៧ ដែលមានទុនវិនិយោគសរុបប្រមាណ៤០លានដុល្លារអាម៉េរិក នៃរំហូរទុនវិនិយោគសរុបនៅកម្ពុជា៕ អត្ថបទ៖ ហ្សាលីន
