ខែមីនា ឆ្នាំ២០២៥ គ្រឹះស្ថានអង្គររកចំណូលបានជិត៦លានដុល្លារអាម៉េរិក

ភ្នំពេញ៖ សម្រាប់ខែមីនា ឆ្នាំ២០២៥ មានទេសចរបរទេសទិញបណ្ណចូលអង្គរចំនួន ១១៨ ៩២៧ នាក់ កើន៦,៤៩ភាគរយ ធៀបរយៈពេលដូចគ្នាឆ្នាំ២០២៤ និងរកចំណូលបានចំនួន ៥ ៥៥០ ៩៤៤ ដុល្លារកើន៤,៧៦ភាគរយ ធៀបនឹងខែកុម្ភៈ ឆ្នាំ២០២៤ ។ នេះបើយោងតាមសេចក្តីប្រកាសពត៌មានរបស់គ្រឹះស្ថានអង្គរកាលពីថ្ងៃទី១ ខែមេសា ឆ្នាំ២០២៥។

ក្រៅពីចំណូលដែលទទួលបានពីការលក់បណ្ណជូនភ្ញៀវទេសចរបរទេសទស្សនារមណីយដ្ឋានអង្គរ គ្រឹះស្ថានអង្គរក៏ទទួលបានចំណូលពីលក់បណ្ណជូនភ្ញៀវវទេសចរនៅប្រាសាទកោះកេរ មានទឹកប្រាក់ជាង ៣៩៦៦០ ដុល្លារអាមេរិកពីទេសចរបរទេស២៦៤៤នាក់។

ចំណែកចំណូលពីការលក់សំបុត្រនៅប្រាសាទបេងមាលាមានចំនួន១៧៨៩០ដុល្លារ ពីទេសចរ១៧៨៩នាក់។រីឯចំណូលពីការលក់សំបុត្រនៅភ្នំក្បាលស្ពានទទួលបាន៤៣៥ដុល្លារពីទេសចរ៨៧នាក់។ចំពោះការលក់សំបុត្រទូកនាខែមីនាទទួលបានចំណូលចំនួន១៩២៧២៨ដុល្លារអាមេរិក៕