អតិថិជនរបស់បុរី ឡេង ណាវ៉ាត្រា គម្រោង ៦ A មួយរូប បានបង្ហាញពីអារម្មណ៍រំភើបខ្លាំងបំផុត ពិសេសពេញចិត្តលើឥរិយាបថរបស់មន្ត្រីក្រសួងរៀបចំដែនដី នគរូបនីយកម្ម និងសំណង់ ក្នុងការផ្តល់សេវាជូនប្រជាពលរដ្ឋ បន្ទាប់ពីលោកទទួលបានប័ណ្ណកម្មសិទ្ធិ ដោយមិនអស់ថ្លៃសេវាអ្វីសោះឡើយ។
បន្ទាប់ពីទទួលបានវិញ្ញាបនបត្រសម្គាល់ម្ចាស់អចលនវត្ថុ នៅទីស្តីការក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី៣ ខែមេសា ឆ្នាំ២០២៥ អតិថិជនរូបនេះ បានលើកឡើងថា៖ “សម្រាប់ការទទួលបានប្លង់នេះ ខ្ញុំអត់មានអស់ថ្លៃសេវាអ្វីនោះទេ ពន្ធក៏ត្រូវបានលើកលែង សេវារដ្ឋបាលក៏ត្រូវបានលើកលែង ហើយក្រៅពីនោះក៏មានការស្វាគមន៍ ការទទួល ការផ្តល់សេវាកម្មយ៉ាងល្អពីមន្ត្រី ដែលជាអ្នកសម្របសម្រួលតាំងពីដំណាក់កាលចាប់ផ្តើម រហូតមកដល់ការទទួលបានប្លង់។ ពួកគាត់ចាប់ផ្តើមធ្វើការតាំងពីម៉ោង ៨ព្រឹក ជាក់ស្តែងម៉ោង៨ជាងនេះ ពួកខ្ញុំបានទទួលប្លង់ហើយ។ នេះជារឿងមួយល្អមែនទែន ហើយខ្ញុំមិនដែលសង្ឃឹមថា ខ្ញុំទទួលបានប្លង់ក្នុងរូបភាពបែបនេះទេ ព្រោះអ្វីជាក់ស្តែងតែម្តង គឺខ្ញុំបានត្រៀមកញ្ចប់ថវិកាផ្ទាល់ខ្លួន សម្រាប់ត្រៀមបង់ពន្ធ ប៉ុន្តែក្នុងឱកាសដែលប្រជាពលរដ្ឋមានទុក្ខលំបាក រាជរដ្ឋាភិបាលក៏ដូចជាក្រសួង បានជួយសម្របសម្រួល ធ្វើឱ្យពួកខ្ញុំទទួលបានប្លង់ដោយមិនមានការចំណាយអ្វីទាំងអស់”។
លោកបានបន្ថែមថា ឆ្លៀតពេលនេះ លោកសូមអរគុណដល់រាជរដ្ឋាភិបាល ជាពិសេសសម្តេចធិបតីនាយករដ្ឋមន្ត្រី និងឯកឧត្តមរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលបានសម្របសម្រួលក្នុងការផ្តល់ការលើកលែងពន្ធប្រថាប់ត្រា និងសេវាចំណាយរដ្ឋបាលផ្សេងៗដល់ប្រជាពលរដ្ឋ ដែលបានទិញផ្ទះនៅបុរី ឡេង ណាវ៉ាត្រា ហើយក៏សូមអរគុណដល់មន្ត្រីក្រសួង ដែលបានផ្តល់សេវាយ៉ាងល្អ។ សម្រាប់លោក នេះជាអារម្មណ៍លើកទី១ហើយ ដែលទទួលសេវារដ្ឋ ហើយមានការពេញចិត្តខ្លាំងបំផុតបែបនេះ។
គួររំឭកថា កាលពីថ្ងៃទី២៧ ខែមីនា ឆ្នាំ២០២៥ ក្រសួងរៀបចំដែនដី នគរូបនីយកម្ម និងសំណង់ បានចេញលិខិតសេចក្តីប្រកាសព័ត៌មាន អញ្ជើញលោក-លោកស្រី ដែលជាអតិថិជនរបស់ គម្រោងផ្ទះនិងដីឡូត៍ ឡេង ណាវ៉ាត្រា ជ្រែមួយរយ និងគម្រោងផ្លូវជាតិលេខ៦អា ដែលមានទីតាំងស្ថិតនៅភូមិជ្រែមួយរយ និងភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្តាល ចូលរួមអនុវត្តនីតិវិធីចុះបញ្ជីផ្ទេរកម្មសិទ្ធិ និងប្រគល់វិញ្ញាបនបត្រសម្គាល់ម្ចាស់អចលនវត្ថុ ចាប់ពីថ្ងៃទី២ ដល់ថ្ងៃទី៤ ខែមេសា ឆ្នាំ២០២៥ វេលាម៉ោង ០៨:៣០នាទីព្រឹក ដល់ម៉ោង ១៧:០០នាទីរសៀល នៅសាលប្រជុំ២០២១ ជាន់ទី២ នាទីស្តីការក្រសួងរៀបចំដែនដី។
បើតាមរបាយការណ៍ដែលបង្ហាញដោយអ្នកឧកញ៉ា ឡេង ណាវ៉ាត្រា លើបណ្តាញសង្គម Facebook ត្រឹមថ្ងៃទី២៧ ខែមីនាកន្លងទៅ បុរីបានបញ្ចប់ការសាងសង់ ១០០% មានចំនួន ៣២៤១ ផ្ទះហើយ ខណៈក្រុមការងារសាងសង់នៅតែបន្តយ៉ាងសកម្មដើម្បីបញ្ចប់ការងារសាងសង់ជូនអតិថិជន៕
