ប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត បានបើកកិច្ចពិភាក្សាលើរឿងសំខាន់ចំនួន ២ ដើម្បីជំរុញលើសេចក្ដីព្រាងផែនការយុទ្ធសាស្រ្ត និងគោលនយោបាយ សំដៅជំរុញសេដ្ឋកិច្ចកម្ពុជា។
កិច្ចប្រជុំនេះ នាថ្ងៃទី៤ ខែមេសា ឆ្នាំ២០២៥ បានធ្វើឡើងក្រោមអធិបតីភាព របស់សម្តេចធិបតី ហ៊ុន ម៉ាណែត និងមានការអញ្ជើញចូលរួមពី ឧបនាយករដ្ឋមន្ត្រី អនុប្រធានទី១ និង ទេសរដ្ឋមន្ត្រី អនុប្រធានទី២ ក្រុមប្រឹក្សាអភិវឌ្ឍន៍កម្ពុជា។
កិច្ចប្រជុំពេញអង្គគណៈរដ្ឋមន្ត្រីនេះ បានពិភាក្សា និងឆ្លងលើរបៀបវារៈចំនួន២ រួមមាន៖១. សេចក្ដីព្រាងផែនការយុទ្ធសាស្រ្តអភិវឌ្ឍន៍ជាតិរបស់រាជរដ្ឋាភិបាលនីតិកាលទី៧ នៃរដ្ឋសភា។ និង២. សេចក្តីព្រាងគោលនយោបាយជាតិស្ដីពីការដឹកជញ្ជូនតាមផ្លូវអាកាស ឆ្នាំ២០២៥-២០៣៥។
សូមរម្លឹកដែរថា កិច្ចប្រជុំនេះ ធ្វើឡើងដើម្បីពិនិត្យ និងសម្រេចលើសំណើតាក់តែងច្បាប់ និងកិច្ចការទាំងឡាយរបស់រាជរដ្ឋាភិបាល។ តាមរយៈកិច្ចប្រជុំគណៈរដ្ឋមន្ត្រីនេះ នាយករដ្ឋមន្ត្រីនឹងដាក់ការណែនាំនានា ពាក់ព័ន្ធកិច្ចការដឹកនាំរដ្ឋ និងបញ្ហានានាក្នុងសង្គមផងដែរ៕ អត្ថបទ៖ ហ្សាលីន
