ក្រុមហ៊ុនអាកាសចរណ៍ធំមួយរបស់ប្រទេតួកគី (Turkish Airlines) គ្រោងចាប់ផ្តើមហោះត្រង់ផ្ទាល់របស់មកកាន់អាកាសយានដ្ឋានអន្តរជាតិតេជោ នាចុងឆ្នាំ២០២៥ ខាងមុខនេះ។
នេះបើយោងតាមជំនួបពិភាក្សា នារសៀល ថ្ងៃទី២១ ខែមេសា ឆ្នាំ២០២៥ ក្រោមវត្តមាន លោក ហួត ហាក់ រដ្ឋមន្រ្តីក្រសួងទេសចរណ៍ ជាមួយលោក Ahmet Olmustur នាយកគ្រប់គ្រងពាណិជ្ជកម្មរបស់ក្រុមហ៊ុនអាកាសចរណ៍ Turkish។
តំណាងក្រុមហ៊នបានឱ្យដឹងថា ជំនួបជាមួយក្រសួងទេសចរណ៍ គឺដើម្បីពិភាក្សាការងារលើការចាប់ផ្តើមហោះត្រង់ផ្ទាល់របស់ក្រុមហ៊ុនពីទីក្រុងអ៊ីស្តាន់ប៊ុលមកអាកាសយានដ្ឋានអន្តរជាតិតេជោ នាចុងឆ្នាំ២០២៥ខាងមុខនេះ និងគោរពជម្រាបអំពីគម្រោងផ្សព្វផ្សាយសក្តានុពលទេសចរណ៍កម្ពុជាដល់ប្រជាជនតួកគី និងពិភពលោកផងដែរ។
សូមបញ្ជាក់ថា ក្រុមហ៊ុនអាកាសចរណ៍តួកគី (Turkish Airlines) ជាក្រុមហ៊ុនដ៏ធំមួយដែលមានជើងហោះហើរច្រើនជាងគេ ជាង១២០ប្រទេសលើពិភពលោក និងបានបម្រើសេវាកម្មដឹកជញ្ជូនអន្តរជាតិជាង៩៥ឆ្នាំមកហើយ។
ក្រុមហ៊ុននេះ មានទីស្នាក់ការនៅទីក្រុងអ៊ីស្តាន់ប៊ុលដែលជាទីក្រុងដ៏ធំរបស់សាធារណរដ្ឋតួកគីយ៉េ និងត្រូវបានស្គាល់ថាជាច្រកទ្វារភ្ជាប់ពិភពលោក ដោយសារលក្ខណៈពិសេសនៃភូមិសាស្រ្តភ្ជាប់រវាងទ្វីបអាស៊ីនិងអឺរ៉ុបរបស់ប្រទេសនេះ៕ អត្ថបទ៖ហ្សាលីន
