ក្រសួងពាណិជ្ជកម្ម បានរៀបចំកម្មវិធី “ផ្គូផ្គងអាជីវកម្ម ដើម្បីជំរុញផលិតផលខ្មែរចូលផ្សារទំនើប និងម៉ាត ឆ្នាំ២០២៥”។កម្មវិធីនេះ ត្រូវបានធ្វើឡើងកាលពីចុងសប្តាហ៍ ធ្វើឡើងក្រោមអធិបតីភាព លោក ស៊ាង ថៃ រដ្ឋលេខាធិការក្រសួងពាណិជ្ជកម្ម។
នាឱកាសនោះ លោក ស៊ាង ថៃ រដ្ឋលេខាធិការក្រសួងពាណិជ្ជកម្ម បានឱ្យដឹងថា កម្មវិធី “ផ្គូផ្គងអាជីវកម្ម ដើម្បីជំរុញផលិតផលខ្មែរចូលផ្សារទំនើប និងម៉ាត ឆ្នាំ២០២៥” គឺរៀបចំឡើងដើម្បីពង្រឹង និងពង្រីកកិច្ចសហប្រតិបត្តិការដៃគូពាណិជ្ជកម្ម តាមរយៈការផ្សារភ្ជាប់ទំនាក់ទំនងរវាងផ្សារទំនើប ម៉ាត និង អ្នកផលិត អ្នកផ្គត់ផ្គង់ផលិតផលខ្មែរ ក្នុងទិសដៅជំរុញ គាំទ្រ និងប្រើប្រាស់ផលិតផលខ្មែរឱ្យកាន់តែទូលំទូលាយនៅលើទីផ្សារក្នុងស្រុក ជាពិសេសការបញ្ជូនទំនិញទៅដាក់លក់ក្នុងក្នុងផ្សារទំនើប និងម៉ាត។
បន្ថែមពីនេះ លោកក៏បានផ្តល់យោបល់ និងអនុសាសន៍ណែនាំដល់អ្នកផលិត អ្នកផ្គត់ផ្គង់ផលិតផលខ្មែរ ឱ្យយកចិត្តទុកដាក់ខ្ពស់ក្នុងការផលិតនូវផលិតផលប្រកបដោយគុណភាព ធានានូវសុវត្ថិភាពប្រើប្រាស់ មានការវេចខ្ចប់ត្រឹមត្រូវតាមស្តង់ដា និងមានតម្លៃសមរម្យ ដើម្បីមានប្រៀបក្នុងការប្រកួតប្រជែង ទាំងលើទីផ្សារក្នុងស្រុក និងទីផ្សារក្រៅប្រទេស។
សូមបញ្ជាក់ថា កម្មវិធីផ្គូផ្គងខាងលើនេះ ក៏មានការធ្វើបទបង្ហាញចែករំលែកបទពិសោធន៍ពីវាគ្មិនចំនួន ៤ រូប មកពី៖១. អគ្គនាយកដ្ឋានជំរុញពាណិជ្ជកម្ម ២. តំណាងផ្សារអ៊ីអន ៣.តំណាងផ្សារជីបម៉ុង និង ៤. តំណាងក្រុមហ៊ុន អ៊ែមផល អាហ្រ្កូ ប្រូដាក់ ខូអិលធីឌី ផ្តោតសំខាន់លើ ការអភិវឌ្ឍជំរុញផលិតផលកម្ពុជា ស្វែងយល់អំពីបែបបទ នីតិវិធី និងលក្ខខណ្ឌនៃការនាំយកផលិតផលខ្មែរចូលទៅតាមបណ្តាផ្សារទំនើប និងម៉ាត និងបទពិសោធន៍ស្ដីពីការនាំយកផលិតផលខ្មែរចូលទៅកាន់ផ្សារទំនើប និងម៉ាតនៅកម្ពុជា ដោយមានការតាំងបង្ហាញផលិតផលខ្មែរចម្រុះជាច្រើនមុខផងដែរ។
កម្មវិធីនេះក៏ជាវេទិកាមួយ ផ្តល់ឱកាសជូនអ្នកផលិត អ្នកផ្គត់ផ្គង់ផលិតផលខ្មែរ បានលើកឡើងពីបញ្ហាប្រឈម និងសំណូមពរជូនម្ចាស់ផ្សារទំនើប និងម៉ាត ពាក់ព័ន្ធនឹងការនាំយកផលិតផលខ្មែរដាក់លក់ក្នុងផ្សារទំនើប និងម៉ាត ក្រោមកិច្ចសម្របសម្រួលពីក្រសួងពាណិជ្ជកម្មផងដែរ៕ អត្ថបទ៖ ហ្សាលីន
