រដ្ឋាភិបាលសម្រេចផ្តល់ភ្លើងខៀវឲ្យវិស័យឯកជនបង្កើតរោងចក្រកែច្នៃផ្លែឈើច្រើនប្រភេទ មានទុនវិនិយោគ ១១,២លានដុល្លារ

រាជរដ្ឋាភិបាលកម្ពុជាតាមរយៈគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុន CAMBODIAN XING CAN SHI PIN CO., LTD. ក្នុងការបង្កើតរោងចក្រកែច្នៃផ្លែឈើ (ដំណាប់ស្វាយ, ម្នាស់, មៀន, ខ្នុរ និងស្វាយចន្ទី) ដែលមានតម្លៃប្រមាណ ១១,២លានដុល្លារអាមេរិក និងអាចបង្កើតការងារបានចំនួន ១៥៤កន្លែង។

គម្រោងបង្កើតរោងចក្រកែច្នៃផ្លែឈើ CAMBODIAN XING CAN SHI PIN CO., LTD. មានទីតាំងវិនិយោគស្ថិតនៅភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។

ជាមួយគ្នានេះដែរ ក្រុមប្រឹក្សាអភិវឌ្ឍន៍កម្ពុជា ក៏បានសម្រេចចេញវិញ្ញាបនបត្រចុះបញ្ជីជាស្ថាពរជូន​ ៦ក្រុមហ៊ុនវិនិយោគទៅលើវិស័យផ្សេងៗគ្នា៕