ថ្លែងក្នុងឪកាសបើកវេទិកាសេដ្ឋកិច្ច និងធុរកិច្ចអាស៊ី-អុីរ៉ុប លើកទីមួយ ក្រោមមូលបទ “ការផ្លាស់ប្តូរទៅគន្លងប្រក្រតីភាពថ្មី៖ ការលើកកម្ពស់ការចូលរួមក្នុងខ្សែច្រវាក់តម្លៃសកល ពហុភាគីនិយម និងបដិវត្តន៍ឧស្សាហកម្មទី៤” នៅព្រឹកថ្ងៃពុធនេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា លើកឡើងថា វេទិកានេះមានការចាំបាច់សម្រាប់វិនិយោគិនធ្វើការកំណត់ និងស្វែងរកឪកាសធុរកិច្ច និងពាណិជ្ជកម្មថ្មីៗ និងសម្រាប់ពង្រឹងកិច្ចសហប្រតិបត្តិការ និងភាពជាដៃគូររវាងវិស័យសាធារណៈ និងឯកជន។
សម្តេចតេជោបានសង្កត់ធ្ងន់ថា ការផ្លាស់ប្តូរលើមូលបទដ៏មានសារៈសំខាន់គឺការផ្លាស់ប្តូរទៅគន្លងប្រក្រតីភាពថ្មី ការលើកកម្ពស់ការចូលរួមក្នុងខ្សែច្រវាក់តម្លៃសកលពហុភាគីនិយម និងបដិវត្តឧស្សាហកម្មទី៤ សំដៅលើកកម្ពស់សកម្មភាពធុរកិច្ច វិនិយោគ និងការអភិវឌ្ឍសហគមន៍សេដ្ឋកិច្ចនៅក្នុងគន្លងប្រក្រតីភាពថ្មី។
ប្រមុខរាជរដ្ឋាភិបាលកម្ពុជាបន្តថា កិច្ចសហការប្រតិបត្តិការអាស៊ី-អុីរ៉ុប បានចូលរួមយ៉ាងសំខាន់ក្នុងការពង្រឹងទំនាក់ទំនងគ្នាទៅវិញទៅមកនៃប្រជជាននិងសេដ្ឋកិច្ច ដើម្បីអភិវឌ្ឍន៍រួម។ ជាមួយគ្នានេះ កិច្ចសហប្រតិបត្តិការនេះ មានសក្តានុពលជាច្រើនទៀត ខណៈដែលទំហំសេដ្ឋកិច្ចអាស៊ី-អុីរ៉ុប មានចំណែកប្រមាណ ៦៥% នៃសេដ្ឋកិច្ចពិភពលោក ៥៥% នៃពាណិជ្ជកម្មសកល។
សូមបញ្ជាក់ថា វេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកទី១ ជាព្រឹត្តិការណ៍អមនៃកិច្ចប្រជុំកំពូលអាស៊ី-អឹរ៉ុប លើកទី១៣ (ASEM13)។ វេទិកានេះ នឹងមានការអញ្ជើញចូលរួមពីមន្ត្រីជាន់ខ្ពស់រដ្ឋាភិបាល អ្នកបង្កើតគោលនយោបាយ វិនិយោគិន ធុរជន បញ្ញាវន្ត និងអ្នកពាក់ព័ន្ធមកពីបណ្តាប្រទេសនៅអាស៊ី និងអឺរ៉ុប៕
