ថ្មីៗនេះ មន្រ្តីរបស់ក្រសួងសាធារណការនិងដឹកជញ្ជូន និងមន្រ្តីក្រសួងសេដ្ឋកិច្ចនិងហិរញ្ញវត្ថុ បានបើកកិច្ចប្រជុំដើម្បីពិនិត្យលើវឌ្ឍនភាពការងារ និងដោះស្រាយបញ្ហាប្រឈមដែលនៅសេសសល់ ទាក់ទងនីតិវិធីបង់ពន្ធប្រថាប់ត្រា និងការផ្ទេរកម្មសិទ្ធិយានជំនិះ។
បើតាមប្រភពពីមន្រ្តីដែលចូលរួមក្នុងកិច្ចប្រជុំបានឲ្យដឹងថា ការផ្ទរកម្មសិទ្ធិយានជំនិះដោយប្រើនីតិវិធីរួមគ្នារវាងក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ មានការកើនឡើងនៅក្នុងខែមករា ឆ្នាំ២០២២កន្លងទៅ។
ប្រភពដដែលបានបន្តថា ក្រុមការងារបច្ចេកទេសតភ្ជាប់ប្រព័ន្ធស្វ័យប្រវត្តិកម្មដឹកជញ្ជូនផ្លូវគោក និងប្រព័ន្ធទិន្នន័យអគ្គនាយកដ្ឋានពន្ធដារ កំពុងខិតខំប្រឹងប្រែងរួមគ្នាក្នុងការជំរុញឱ្យការងារផ្ទេរកម្មសិទ្ធិយានជំនិះ និងបង់ពន្ធប្រថាប់ត្រាតាមនីតិវិធីរួមគ្នានេះ ឱ្យអនុវត្តបានទាំងស្រុងចាប់ថ្ងៃទី១៥ ខែមីនា ឆ្នាំ២០២២នេះតទៅ ដើម្បីសម្រួលការផ្តល់សេវា និងភាពងាយស្រួលជូនបងប្អូនប្រជាពលរដ្ឋ។
នីតិវិធីផ្ទេរកម្មសិទ្ធិ និងបង់ពន្ធប្រថាប់ត្រារួមគ្នា ត្រូវបានកំណត់ដោយប្រកាសអន្តរក្រសួង រវាងក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ កាលពីថ្ងៃ២៧ ខែសីហា ឆ្នាំ២០២០ ហើយបានដាក់ឱ្យដំណើរការជាផ្លូវការនូវនីតិវិធីផ្ទេរកម្មសិទ្ធិ និងបង់ពន្ធប្រថាប់ត្រារួមគ្នា កាលពីថ្ងៃទី៣០ ខែកញ្ញា ឆ្នាំ២០២០។
គំនិតផ្តួចផ្តើមនេះ បង្កើតឡើងដើម្បីជួយសម្រួលដល់យន្តការ ដែលធានានូវភាពងាយស្រួល ចំណេញពេលវេលាដល់ប្រជាពលរដ្ឋ ព្រមទាំងធានានូវប្រសិទ្ធភាព និងតម្លាភាពក្នុងការផ្តល់សេវាសាធារណៈ និងការប្រមូលពន្ធ ដោយទទួលបានការគាំទ្រ និងសាទរជាខ្លាំងពីសំណាក់បងប្អូនប្រជាពលរដ្ឋ៕
