សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសថា កម្ពុជាប្រកាន់ជំហរជាគោលការណ៍មិនថាតែរុស្ស៉ីនោះទេ ប្រទេសណាក៏ដោយដែលឈ្លានពានទៅកាន់ប្រទេសមួយទៀត គឺកម្ពុជាប្រឆាំងជានិច្ច។
ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការ អគារជំងឺត្រចៀក ច្រមុះ បំពង់ក នៃមន្ទីរពេទ្យអង្គឌួងនាព្រឹកថ្ងៃទី២៨ ខែមីនា ឆ្នាំ២០២២នេះ សម្តេចតេជោ ហ៊ុន សែន បានបញ្ជាក់ថា ទោះបីរុស្ស៊ីជាមិត្តរបស់កម្ពុជា ធ្លាប់ជួយដល់កម្ពុជា ក៏ប៉ុន្តែរុស្ស៉ីបានឈ្លានពាន អ៊ុយក្រែន សកម្មភាពឈ្លានពានបែបនេះកម្ពុជាមិនអាចទទួលយកបាន ហើយមិនអាចអព្យាក្រឹតបានទេ ថ្ងៃក្រោយកម្ពុជារងបញ្ហាបែបតើកម្ពុជាទៅពឹងនរណា? ។
សម្ដេចតេជោ ហ៊ុន សែន បានសង្កត់ធ្ងន់ថា នយោបាយការបរទេសកម្ពុជា គឺផ្អែកលើច្បាប់ និងធម្មនុញ្ញអង្គការសហប្រជាជាតិ កម្ពុជាមិនមែនអនុវត្តន៍គោលនយោបាយការបរទេស ផ្អែកលើកម្លាំងនោះទេ ។
សម្ដេចតេជោ ហ៊ុន សែន បានបន្តថា ជំហរផ្លូវការរបស់កម្ពុជាគឺប្រឆាំងដាច់ខាតជាមួយនឹងការប្រើប្រាស់កម្លាំង ឬការ គំរាមប្រើប្រាស់កម្លាំងប្រឆាំងនឹងប្រទេសមួយផ្សេងទៀត ក្នុងទនាក់ទំនងអន្តរជាតិ ត្រូវតែគោរពឯករាជ្យ និងអធិប តេយ្យភាពរបស់ប្រទេសនានា។ ការគោរពឯករាជ្យ និងអធិបតេយ្យ អ៊ុយក្រែន ស្មើនឹងការគោរពឯករាជ្យ និង អធិប តេយ្យកម្ពុជាដូចគ្នា ទោះបីជាកម្ពុជាប្រទេសកម្ពុជា ជាប្រទេសមហាអំណាចយោធាលើ ពិភពលោកក៏កម្ពុជាមិន ប្រើប្រាស់កម្លាំង ដើម្បីធ្វើការឈ្លានពានប្រទេសដទៃនោះឡើយ។
គួរបញ្ជាក់ថា សង្គ្រាមនៅអ៊ុយក្រែនដែលបានចាប់ផ្ទុះឡើងកាលពីថ្ងៃទី២៤ កុម្ភៈ ឆ្នាំ២០២២ កំពុងបន្ត បណ្តលមានការបាត់បង់ជីវិត និងរបួសជនស៊ីវិល និងយោធា ហើយបច្ចុប្បន្ន ពិភពលោកកំពុងតែតាមដានមើលយ៉ាងយកចិត្តទុកដាក់ជាទីបំផុត ។ ជាមួយគ្នា ក្រោយសង្គ្រាម ផ្ទុះឡើងរវាងរស្ស៊ី និងអ៊ុយក្រែន ក៏បានតម្លៃប្រេង នៅលើ ពិភពលោក បានហក់ឡើងកាន់តែខ្ពស់ ដែលកំពុងចោទជាបញ្ហាកាន់ តែច្រើនសេដ្ឋ កិច្ចពិភពលោក ៕
