ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក បានលើកឡើងថា ប្រជាជនទូទាំងប្រទេស បានកម្សាន្តសប្បាយក្នុងពិធីបុណ្យចូលឆ្នាំថ្មីប្រពៃណីជាតិ ដែលត្រូវបានប្រារព្ធទ្បើងយ៉ាងអាធិកអធមដោយទំនុកចិត្តខ្ពស់ និងមិនមានការភ័យខ្លាច ដោយខុសកាលពីខែមេសា ឆ្នាំ២០២១ ដែលក្នុងកាលៈទេសៈ នោះប្រជាពលរដ្ឋកម្ពុជា ក៏ដូចជានៅទូទាំងពិភពលោក កំពុងជាប់មមាញឹកក្នុងការប្រយុទ្ធប្រឆាំង នឹងការរីករាលដាលគួរឱ្យព្រួយបារម្ភនៃជំងឺកូវីដ-១៩។
ការលើកឡើងរបស់ឧត្តមសេនីយ៍ឯក ហ៊ុន ម៉ាណែត ដូចនេះ ធ្វើឡើងនៅក្នុងពិធីសម្ពោធអគារសិក្សា និងសមិទ្ ធផលនានា ក្នុងវិទ្យាល័យ សុខ អាន ដូងខ្ពស់បូរីជលសារ ក្នុងខេត្តតាកែវ នាថ្ងៃទី១៩ ខែមេសា ឆ្នាំ២០២២។
ឧត្តមសេនីយ៍ឯក ហ៊ុន ម៉ាណែត បានលើកឡើងទៀតថា ការគ្រប់គ្រងស្ថានការណ៍ប្រកបដោយជោគជ័យលើជំងឺកូវីដ១៩ មិនបានកើតទ្បើងដោយចៃដន្យនោះទេ ជាក់ស្តែងដោយសារ កិច្ចខិតខំប្រឹងប្រែងរបស់ សម្តេចតេជា ហ៊ុន សែន នាយករដ្ឋមន្ត្រី ក៏ដូចជាមន្ត្រីរាជការ កងទ័ពអាវស និងកងកម្លាំងប្រដាប់អាវុធគ្រប់ប្រភេទ រួមជាមួយនឹងប្រជាពលរដ្ឋនៅទូទាំងប្រទេស ដោយរួមសាមគ្គីប្រយុទ្ធក្នុងសង្គ្រាមមេរោគរាតត្បាត មួយនេះ រហូតនាំកម្ពុជាឱ្យឈរចំណាត់ថ្នាក់ខ្ពស់ក្នុង ពិភពលោក ក្នុងនាមជាប្រទេសដែលមាន សមត្ថភាពស្តារខ្លួនងើបចេញពីជំងឺកូវីដ១៩។
គួររម្លឹកថា កម្ពុជាប្រារព្ធពិធីបុណ្យចូលឆ្នាំថ្មីប្រពៃណីជាតិ កាលពីថ្ងៃទី១៤ ១៥ និង១៦ ខែមេសា កន្លងទៅថ្មីៗនេះ ដែលតាមបណ្តាខេត្ត រាជធានី មានការរៀបចំកម្មវីធីសង្រ្កាន្ត ដោយមានប្រជាជនជួបជុំគ្នាសប្បាយយ៉ាងកុះករ ក្រោយខកខាន២ឆ្នាំដោយសារការឆ្លងរាលដាលជំងឺកូវីដ១៩ ។
តាមរបាយការណ៍របស់ក្រសួងទេសចរណ៍ រយៈពេល៣ថ្ងៃ នៃពិធីបុណ្យចូលឆ្នាំខ្មែរ កម្ពុជាទទួលបានទេសចរជាតិ-អន្តរជាតិ សរុបជិត ៤,៦លាននាក់ ។ ក្នុងនោះ ខេត្តបាត់ដំបង កំពង់ចាម និងសៀមរាប មានទេសចរទៅកម្សាន្តច្រើនជាងគេ៕
