ពាណិជ្ជករកម្ពុជានិងជប៉ុនដែលសរុបមានជាង ៥០ ក្រុមហ៊ុនបានជួបប្រជុំគ្នា ដើម្បីស្វែងរកឱកាសវិនិយោគទៅវិញទៅមក។ វេទិការជួបជុំគ្នានេះរៀបចំឡើងដោយធនាគារ អេស៊ីលីដា ភីអិលស៊ី ដោយសហការជាមួយសមាគមជប៉ុនកម្ពុជា (JCA)។
លោកអ៉ិន ចាន់នី ប្រធាននាយកប្រតិបត្តិធនាគារអេស៊ីលីដាភីអិលស៊ី មានប្រសាសន៍ថា ខាងសមាគមជប៉ុនកម្ពុជា ដែលមានលោកតាកាហាស៊ី ដែលជាអតីតឯកអគ្គរាជទូតជប៉ុនប្រចាំនៅកម្ពុជាជាប្រធាន បាននាំក្រុមហ៊ុនចំនួន ២៤ មកស្វែងរកដៃគូធ្វើពាណិជ្ជកម្មជាដែលមានក្រុមហ៊ុនអភិវឌ្ឍន៍លំនៅឋាន ផ្នែកសុខាភិបាល ការនាំចេញនាំចូល សេវាកម្ម វិស័យកាត់ដេរ បច្ចេកវិទ្យានិងកសិកម្ម។
ចំណែកធនាគារអេស៊ីដា បានណែនាំក្រុមហ៊ុនចំនួន ២៩ ដែលវិនិយោគប្រហាក់ប្រហែលទៅនឹងខាងក្រុមហ៊ុនជប៉ុនដែរ ដើម្បីងាយស្រួលក្នុងការធ្វើពាណិជ្ជកម្មជាមួយគ្នា។
លោក អ៊ិន ចាន់នីបានបន្តទៀតថា វេទិកានេះមានសារៈសំខាន់ណាស់ ដោយសាររាជរដ្ឋាភិបាលកម្ពុជាបានគ្រប់គ្រងជំងឺកូវីដ១៩ បានល្អ ដែលធ្វើឲ្យអ្នកវិនិយោគិនជប៉ុនជ្រើសរើសវេលានៅក្នុងខែមេសាធ្វើដំណើរមកកម្ពុជាដើម្បីស្វែងរកដៃគូពាណិជ្ជកម្ម។
លោកក៏ស្វាគមន៍សមាគមកពីបណ្តាប្រទេសផ្សេងៗទៀត ដែលមានការចាប់អារម្មណ៍ហើយធនាគារនឹងជួយរៀបចំវេទិកាដើម្បីឱ្យវិនិយោគិនប្រទេសទាំងសងខាងបានជួបជុំគ្នា បង្ហាញឱកាសវិនិយោគខណៈកន្លងមកធនាគារធ្លាប់បានធ្វើជាមួយកូរ៉េខាងត្បូងផងដែរ។
គួរបញ្ជាក់ថានេះជាលើកទីពីរដែលធនាគារអេស៊ីលីដាភីអិលស៊ី បានរៀបចំវេទិការវាងពាណិជ្ជករជប៉ុននិងកម្ពុជា ជួបគ្នាដើម្បីស្វែងរកឱកាសវិនិយោគ។ កាលពីឆ្នាំ២០១៩ ជំនួបពាណិជ្ជករភាគទុនិកជប៉ុនជាង១០០ នាក់ ដើម្បីស្វែងរកវិធីសាស្ត្រថ្មីៗបន្ថែមទាក់ទិននឹងការធ្វើប្រតិបត្តិការ និងផ្តល់សេវាកម្មផ្សេងៗរបស់ធនាគារជួនប្រជាពលរដ្ឋឲ្យកាន់តែប្រសើរឡើងថែមទៀត៕
