បើតាមការប្រកាសរបស់រដ្ឋាករទឹកស្វយ័តភ្នំពេញបានឲ្យដឹងថា នៅឆ្នាំ២០២៣ កង្វះទឹកស្អាតប្រើប្រាស់នៅទីក្រុងភ្នំពេញ និងក្រុងតាខ្មៅនឹងត្រូវបញ្ចប់ នៅពេលរោងចក្រផលិតទឹកស្អាតថ្មីនៅសង្កាត់បាក់ខែងដាក់ឲ្យដំណើរការដែលមានសមត្ថកិច្ចផលិតទឹកស្អាតបន្ថែម ៤០០.០០០ម៣/ថ្ងៃ។
ដើម្បីឆ្លើយតបទៅនឹងកំណើនតម្រូវការប្រើប្រាស់ទឹកស្អាតនេះ រដ្ឋាករទឹកស្វយ័តភ្នំពេញកំពុងពន្លឿនការងារសាងសង់រោងចក្រផលិតទឹកស្អាតថ្មីនៅសង្កាត់បាក់ខែង ខណ្ឌជ្រោយចង្វារ ដែលគ្រោងបញ្ចប់ការសាងសង់ និងដាក់ឱ្យដំណើរការក្នុងឆ្នាំ២០២៣ ហើយអាចផលិតទឹកស្អាតបានបន្ថែមប្រមាណ ៤០០.០០០ម៣/ថ្ងៃលើសមត្ថភាពផលិតដែលមានស្រាប់ ៦០០.០០០ម៣/ថ្ងៃ។
រដ្ឋាការទឹកស្វយ័តក្រុងភ្នំពេញបានឲ្យដឹងថា ចាប់តាំងពីដើមឆ្នាំ២០២២នេះ ការរីករាលដាលនៃជំងឺកូវីដ-១៩ មានការថមថយ បានធ្វើឱ្យរំហូរចូលប្រជាពលរដ្ឋក៏ដូចជាការវិនិយោគវិស័យសំណង់តូច-ធំ (ខុនដូ បុរី ឃ្លាំង ផ្សារទំនើប) វិស័យពាណិជ្ជកម្ម វិស័យទេសចរណ៍ និងវិស័យផ្សេងៗជាច្រើនទៀត ក្នុងរាជធានីភ្នំពេញ និងក្រុងតាខ្មៅ មានការកើនឡើងយ៉ាងឆាប់រហ័សឥតឈប់ឈរពីមួយថ្ងៃទៅមួយថ្ងៃ ដែលជាហេតុនាំឱ្យមានតម្រូវការប្រើប្រាស់ទឹកស្អាតកើនឡើងខ្ពស់ លើសពីសមត្ថភាពផលិតប្រមាណជា ២០ម៉ឺនម៣/ថ្ងៃ (តម្រូវការប្រើប្រាស់ទឹកប្រមាណ ៨០០.០០០ ម៣/ថ្ងៃ ឯសមត្ថភាពផលិតមានត្រឹម ៦០០.០០០ម៣/ថ្ងៃប៉ុណ្ណោះ)។
ចាប់ពីឆ្នាំ២០២៣ តទៅ រដ្ឋាករទឹកស្វយ័តក្រុងភ្នំពេញនឹងមានសមត្ថភាពផលិតទឹកស្អាតសរុប ១.០០០.០០០ម៣/ថ្ងៃ ដែលនឹងបិទបញ្ចប់នូវបញ្ហាកង្វះទឹកស្អាតនៅរាជធានីភ្នំពេញនិងក្រុងតាខ្មៅ៕
