អគ្គលេខាធិការដ្ឋាននៃគណៈកម្មាធិការជាតិវាយតម្លៃទីក្រុងស្អាត បានរៀបចំកិច្ចប្រជុំពិគ្រោះយោបល់លើសេចក្តីព្រាងស្តង់ដា “ភូមិទេសចរណ៍គំរូ” ដោយភ្ជាប់ទៅស្ថានភាពជាក់ស្តែងនៃបណ្តាភូមិនានានៅទូទាំងប្រទេសកម្ពុជា។
ការរៀបចំនូវសេចក្តីព្រាងស្តង់ដា ”ភូមិទេសចរណ៍គំរូ” នេះធ្វើឡើងក្រោមគំនិតផ្តួចផ្តើមពីអង្គការទេសចរណ៍ពិភពលោក (UNWTO) និងយោងទៅតាមគោលនយោបាយ ទេសចរណ៍ជាតិក្នុងការអភិវឌ្ឍកសិ-ទេសចរណ៍នៅតាមជនបទ ដើម្បីចូលរួមក្នុងការធ្វើឱ្យប្រសើរឡើងជីវភាពរបស់ប្រជាពលរដ្ឋ នៅតាមមូលដ្ឋានដែលជាគោលដៅយុទ្ធសាស្រ្តនៅក្នុង ”ផែនទីចង្អុលផ្លូវ” របស់រាជរដ្ឋាភិបាលស្តីពីផែនការស្តារ និងលើកស្ទួយវិស័យទេសចរណ៍កម្ពុជាក្នុងនិងក្រោយវិបត្តិជំងឺកូវីត-១៩។
លោក ជា បូរ៉ា រដ្ឋលេខាធិការក្រសួងទេសចរណ៍ និងជាអនុប្រធានគណៈកម្មាធិការជាតិវាយតម្លៃទីក្រុងស្អាតបានឲ្យដឹងថា ភូមិទេសចរណ៍ត្រូវបានបង្កើតឡើងដោយផ្អែកលើលក្ខណៈពិសេសរបស់ភូមិនីមួយៗ ដោយភ្ជាប់ទំនាក់ទំនងជាមួយវប្បធម៌-ធម្មជាតិ បរិស្ថាន បេតិកភណ្ឌ សង្គម បុរាណវិទ្យា និងការប្រតិបត្តិតាមប្រពៃណីរបស់ភូមិនីមួយៗ។
លោកបន្តថា គោលបំណងក្នុងការរៀបចំស្តង់ដា ”ភូមិទេសចរណ៍គំរូ” មាន ៤ ចំណុចធំៗ៖
១. ការអភិវឌ្ឍផលិតផលទេសចរណ៍ សំដៅដល់ការជំរុញទាក់ទាញទីផ្សារទេសចរណ៍ក្នុងស្រុក និងអន្តរជាតិ ទាំងក្នុងនិងក្រោយវិបត្តិជំងឺកូវីត-១៩។ ២. ផ្តើមចេញពីការអភិវឌ្ឍភូមិទេសចរណ៍ យើងអាចទាក់ទាញទាំងទេសចរក្នុងស្រុក ទាំងទេសចរ អន្តរជាតិឲ្យទៅទស្សនា និងកម្សាន្តនៅតាមជនបទ ដែលអាចបង្កើតការងារ និងចំណូលជាច្រើន បន្ថែមទៀតដល់ប្រជាពលរដ្ឋតាមមូលដ្ឋាន ដែលជាកត្តាជួយកាត់បន្ថយភាពក្រីក្រនៅជនបទ ស្របតាមគោលនយោបាយជាតិអភិវឌ្ឍន៍ទេសចរណ៍។ ៣. ផលបានមកពីការអភិវឌ្ឍ ”ភូមិទេសចរណ៍” គឺអាចឲ្យប្រជាពលរដ្ឋចូលរួមចំណែកក្នុងការ អភិរក្សវប្បធម៌ និងធម្មជាតិ។ ៤. ដោយសារការងារ និងចំណូលបានមកពីវិស័យកសិ-ទេសចរណ៍ យើងក៏អាចទទួលជោគជ័យ ដល់កិច្ចខិតខំប្រឹងប្រែងគាំពារដល់បរិស្ថាន ព្រមទាំងជីវៈចម្រុះផងដែរ៕
