សម្ព័ន្ធក្រុមហ៊ុនជីប ម៉ុង ដែលក្តោបក្តាប់មុខជំនួញធំៗជាច្រើន កំពុងប្រើប្រាស់ឧទ្ធម្ភាចក្រ ០៣ គ្រឿងសម្រាប់ប្រើប្រាស់លើអាជីវកម្មរបស់ខ្លួន។
ឧទ្ធម្ភាគចក្រទាំង ៣គ្រឿងមានម៉ូដែល Bell UX-505 ម៉ូដែល Bell UX-506 និងម៉ូដែលបញ្ជាទិញចុងក្រោយគឺ Bell 429។
ម៉ូដែល Bell 429 ក្រុមហ៊ុនជីបម៉ុង បញ្ជាទិញពីក្រុមហ៊ុន Textron Inc. ដែលជាក្រុមហ៊ុនផលិតឧទ្ធម្ភាគចក្រដ៏ធំមួយ មានមូលដ្ឋាននៅសហរដ្ឋអាមេរិក។
ឧទ្ធម្ភាគចក្រ Bell 429 មានចំនួនជាង ៤០០គ្រឿង ត្រូវបានប្រើប្រាស់នៅជុំវិញពិភពលោក។ យន្តហោះនេះគឺជាឧទ្ធម្ភាគចក្រម៉ាស៊ីនភ្លោះតូចមួយ ដែលទទួលបានជោគជ័យបំផុតនៅលើទីផ្សារ ចាប់តាំងពីទទួលបានវិញ្ញាបនបត្រក្នុងឆ្នាំ ២០០៩ ។ Bell 429 មានភាពល្បីល្បាយដោយសារមានល្បឿនពិសេស និងការចំណាយទាប។
អ្នកឧកញ៉ា លាង ម៉េង ប្រធានក្រុមអគ្គនាយកក្រុមហ៊ុន ជីប ម៉ុង មានប្រសាសន៍ថា ការទិញឧទ្ធម្ភាគចក្រ Bell 429 ដ៏ទំនើបនេះ បញ្ជាក់ពីទំនុកចិត្តរបស់ក្រុមហ៊ុន ជីប ម៉ុង លើឧទ្ធម្ភាគចក្រម៉ាក Bell ដែលអាចជួយជំរុញពាណិជ្ជកម្មក្រុមហ៊ុនឲ្យកាន់តែរីកចម្រើន។ ឧទ្ធម្ភាគចក្រម៉ូដែល Bell 429 រួមនឹងឧទ្ធម្ភាគចក្រម៉ូដែល Bell 505s ដែលយើងមានស្រាប់ នឹងបម្រើតម្រូវការនៃពាណិជ្ជកម្មជីប ម៉ុងដែលកំពុងរីកលូតលាស់ទៅមុខឥតឈប់ឈរ។
អ្នកឧកញ៉ា លាង ម៉េង បានបន្ថែមទៀតថា នេះក៏ជាកិច្ចខិតខំប្រឹងប្រែងមួយក្នុងការរួមចំណែកអភិវឌ្ឍ សេដ្ឋកិច្ចស្របតាមគោលនយោបាយណែនាំ និងកិច្ចខិតខំប្រឹងប្រែងរបស់រាជរដ្ឋាភិបាលផងដែរ។៕
