ដើម្បីចូលរួមអនុវត្តផែនការយុទ្ធសាស្រ្ត ក៏ដូចជាយន្តការកំណែទម្រង់នគរបាលជាតិ និងការកសាងកម្លាំងក្រសួងមហាផ្ទៃ ឲ្យកាន់តែល្អប្រសើបន្ថែមទៀត លោកឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ បានជំរុញដល់នគរបាលសន្តិសុខផ្ទៃក្នុង និងនគរបាលអនុវត្តចរាចរណ៍ផ្លូវគោកទាំងអស់ គប្បីបំពេញការងាររបស់ខ្លួនប្រកបដោយវិជ្ជាជីវៈ ។
ការជំរុញរបស់ឧត្តមសេនីយ៍ឯកដូចនេះ បានធ្វើឡើងនៅក្នុងពិធីបិទវគ្គបណ្តុះបណ្តាលបំប៉នជំនាញចរាចរណ៍ផ្លូវគោក និងបំប៉នជំនាញសន្តិសុខផ្ទៃក្នុងនៅសាលានគរបាលមិត្តភាពកម្ពុជា-វៀតណាម ក្នុងខេត្តកំពង់ស្ពឺ នាព្រឹកថ្ងៃទី០៥ ខែឧសភា ឆ្នាំ២០២២នេះ។
ឧត្តមសេនីយ៍ឯក ឌី វិជ្ជា បានលើកឡើងថា ក្នុងនាមជាកងកម្លាំងបម្រើសន្តិសុខសណ្តាប់ធ្នាប់ជូនដល់ប្រជាពលរដ្ឋ ក៏ដូចជាប្រទេសជាតិទាំងមូលត្រូវធ្វើអ្វីគោរពទៅតាមវិន័យ និងវិជ្ជាជីវៈរបស់ខ្លួន ដូចអ្វីដែលស្របទៅតាមការកែទម្រង់របស់ក្រសួងមហាផ្ទៃ ក៏ដូចជារាជរដ្ឋាភិបាល។
ឧត្តមសេនីយ៍ឯក បានបញ្ជាក់ថា ការផ្តល់វគ្គបណ្តុះបណ្តាលជំនាញនានាដល់កងកម្លាំងនគរបាលទាំងអស់ គឺដើម្បីបង្កើនជំនាញ សមត្ថភាព និងវិជ្ជាជីវៈ ក្នុងកិច្ចការងារថែរក្សាសន្តិសុខសណ្តាប់ធ្នាប់ជូនដល់ប្រជាជន និងប្រទេសជាតិ។ វគ្គបណ្តុះបណ្តាលនេះ ដើម្បីឲ្យយល់ដឹងកាន់តែច្បាស់បន្ថែមទៀតនូវមូលដ្ឋានច្បាប់របស់កងកម្លាំងនគរបាលផងដែរ។
ជាមួយគ្នានេះ ឧត្តមសេនីយ៍ឯក ឌី វិជ្ជា ក៏បានថ្លែងកោតសរសើរចំពោះកងកម្លាំងនគរបាលទាំងអស់នាពេលកន្លងមក ដែលបានខិតខំថែរក្សាសន្តិសុខសណ្តាប់ធ្នាប់ជូនដល់ប្រជាជន និងប្រទេសជាតិផងដែរ ជាពិសេសក្នុងរយៈពេលពីរឆ្នាំចុងក្រោយនេះ បានខិតខំយ៉ាងខ្លាំងទាំងយប់ទាំងថ្ងៃ ក្នុងការចូលរួមជាមួយរាជរដ្ឋាភិបាល ទប់ស្កាត់ការរីករាលដាល នៃមេរោគកូវីដ-១៩ ទទួលបានជោគជ័យ តាំងពីចាប់ផ្តើមបិទប្រទេស រហូតបើកដំណើរការប្រទេសឡើងវិញ ៕
