បច្ចុប្បន្នប្រទេសកម្ពុជាកំពុងអភិវឌ្ឍន៍ខ្លាំងទៅលើវិស័យកម្មន្តសាល ជាពិសេសខាងផ្នែករោងចក្រឧស្សាហកម្មដែលមានប្រទេសជាច្រើនមកធ្វើបណ្ដាក់ទុនវិនិយោគជាបន្តបន្ទាប់ ក្នុងនោះប្រទេសដែលមកវិនិយោគនៅកម្ពុជាច្រើនជាងគេគឺប្រទេសចិន។
ថ្មីៗនេះ ក្រុមប្រឹក្សាអភិវឌ្ឍន៍កម្ពុជាបានចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនចំនួន ៤ វិនិយោគលើវិស័យផ្សេងៗក្នុងទំហំទឹកប្រាក់ ១៥,៨លានដុល្លារ ដែលបង្កើតការងារជូនប្រជាពលរដ្ឋជាង ៥៧៥០ កន្លែង។
រោងចក្រដែលទទួលបានការអនុញ្ញាតិវិនិយោគមានទីតាំងនៅខេត្តកណ្ដាលចំនួន ២ ខេត្តកំពង់ស្ពឺ ១ និងខេត្តតាកែវ ១ ដែលវិនិយោគលើរោងចក្រស្បែកជើង ផលិតកាបូប និងសម្លៀកបំពាក់។
តាមក្រុមប្រឹក្សាអភិវឌ្ឍកម្ពុជា ក្រុមហ៊ុនទាំង ៤ មានឈ្មោះដូចជា៖
១. OCEAN FAST (CAMBODIA) FOOTWEAR FACTORY CO., LTD. គម្រោងបង្កើតរោងចក្រផលិតស្បែកជើង ដែលមានទីតាំងវិនិយោគស្ថិតនៅផ្លូវជាតិលេខ៥១ ភូមិដំណាក់ព្រីង ឃុំទំនប់ធំ ស្រុកពញាឮ ខេត្តកណ្តាល មានទុនវិនិយោគប្រមាណ ៦លានដុល្លារអាមេរិក និងអាចបង្កើតការងារបានចំនួន ១.៩១៤កន្លែង។
២. CASE SI TRAVEL PRODUCTS CO., LTD គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិកំណប់ ឃុំអង្គពពេល ស្រុកគងពិសី ខេត្តកំពង់ស្ពឺ ទុនវិនិយោគប្រមាណ ៤,១ លានដុល្លារអាមេរិក និងអាចបង្កើតការងារបានចំនួន ១.០២៤កន្លែង។
៣. SYHJ GARMENT (CAMBODIA) CO., LTD. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ៤ ភូមិស្វាយជ្រុំ ឃុំបែកចាន ស្រុកអង្គស្នួល ខេត្តកណ្តាល មានទុនវិនិយោគប្រមាណ ៣,៤លានដុល្លារអាមេរិក និងអាចបង្កើតការងារបានចំនួន ១.៩៥៨កន្លែង។
៤. SUNRISE OUTDOORS (CAMBODIA) CO., LTD. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិវះពោះ ឃុំខ្វាវ ស្រុកសំរោង ខេត្តតាកែវ មានទុនវិនិយោគប្រមាណ ២,៣លានដុល្លារអាមេរិក និងអាចបង្កើតការងារបានចំនួន ៨៥៧កន្លែង៕
