នាយកប្រចាំតំបន់អាស៊ីប៉ាស៊ីហ្វីក នៃអង្គការសុខភាពពិភពលោក (WHO) កោតសរសើរកម្ពុជា ហើយក៏បានលើកឡើងនូវគុណសម្បត្តិចំនួន៣ចំនុចធំៗ លើការទប់ស្កាត់ជំងឺកូវីដ-១៩ របស់កម្ពុជានាពេលកន្លងមកផងដែរ។ ការលើកឡើងនេះ ត្រូវបានបង្ហាញឡើងក្នុងជំនួបរវាង សម្ដេច ហ៊ុន សែន និងឯឧត្តម Takeshi kasai នាយកប្រចាំតំបន់អាស៊ីប៉ាស៊ីហ្វីក នៃអង្គការសុខភាពពិភពលោក (WHO) កាលថ្ងៃទី៣០ ខែមិថុនា ឆ្នាំ២០២២។
ក្នុងជំនួបនោះ ឯកឧត្តម បណ្ឌិត Takeshi kasai បានទទួលស្គាល់ចំពោះវីរភាពដឹកនាំរបស់សម្ដេច ក្នុងការដឹកនាំ ប្រយុទ្ធប្រឆាំងជំងឺកូវីដ-១៩ ជាមួយនឹងកិច្ចប្រឹងប្រែងយ៉ាងសកម្មរបស់រដ្ឋមន្ត្រីក្រសួងសុខាភិបាល មន្ទីរសុខាភិបាល យុវជនស្ម័គ្រចិត្ត និងប្រជាជនកម្ពុជា។
ជាមួយគ្នានេះ ឯកឧត្តម ក៏បានធ្វើការកត់សម្គាល់នៅចំនុចធំៗចំនួន ៣ រួមមាន៖ ទី១.កម្ពុជាដើរជាគំរូនៅក្នុងក្របខ័ណ្ឌតំបន់និងពិភពលោកក្នុងការចាក់វ៉ាក់សាំងជូនប្រជាជន។ ទី២.កម្ពុជាជាប្រទេសគំរូក្នុងការតាមដានវិភាគនិងឆ្លើយតបទាន់ពេលវេលាទៅនឹងការងារប្រយុទ្ធប្រឆាំងជំងឺកូវីដ-១៩។ មិនតែប៉ុណ្ណោះបានចែករំលែកបទពិសោធន៍ដល់ប្រទេសដទៃផងដែរ។ ទី៣. ឯកឧត្តមមានសេចក្ដីរីករាយ និងថ្លែងអំណរគុណជាទីបំផុត ចំពោះសម្តេចតេជោ ដែលបានអនុញ្ញាត្តអោយទទួលកប៉ាល់ westerdam ចូលចតនៅកម្ពុជា ។
មិនតែប៉ុណ្ណោះ ឯកឧត្តម ក៏បានប្ដេជ្ញាចិត្តធ្វើការជាមួយប្រទេសទាំងអស់ ដើម្បីប្រយុទ្ធប្រឆាំងជំងឺកូវីដ-១៩ នឹងជំងឺដទៃទៀតដូចជា ជំងឺគ្រុនចាញ់ ជំងឺថ្លើម ជំងឺលើសឈាម និងជំងឺដទៃទៀត រួមទាំងការទប់ទល់ការប្រើប្រាស់ថ្នាំជក់ផងដែរ។
ជាការឆ្លើយតប សម្ដេច ហ៊ុន សែន នាយករដ្ឋមន្ត្រីកម្ពុជា ក៏បានចែករំលែកបទពិសោធន៍អំពីការចាក់វ៉ាក់សាំងជូនប្រជាពលរដ្ឋតាមរយៈអភិក្រមផ្ការីក ហើយនៅពេលនេះ កម្ពុជា កំពុងលើកទឹកចិត្តឲ្យប្រជាពលរដ្ឋ ចាក់ដូសជំរុញព្រោះថា ការចាក់ត្រឹមតែដូសមូលដ្ឋាន គឺមិនគ្រប់គ្រាន់សម្រាប់ទប់ស្កាត់ជំងឺកូវីដ-១៩ នោះទេ។
គួរបញ្ជាក់ដែរថា ក្រៅពីលើកឡើងនូវគុណសម្បត្តិទាំង៣ចំនុចខាងលើហើយនោះ នាយកប្រចាំតំបន់អាស៊ីប៉ាស៊ីហ្វីក នៃអង្គការសុខភាពពិភពលោក (WHO)រូបនេះ ក៏បានបញ្ជាក់ដែរថា កម្ពុជា ជាប្រទេសដែលបានជួយជីវិតរបស់ប្រជាជនដែលជាប់នៅលើកប៉ាល់ westerdamនាពេលនោះថែមទៀត៕
