លោកជំទាវ ម៉ែន ភក្ដី ហុក ឡងឌី ដែលធ្លាប់តែធ្វើបុណ្យចែកទានជារឿយៗនោះ នៅម្សិលមិញនេះ បានធ្វើពិធីបុណ្យធំរាប់បាត្រធំដោយមានព្រះសង្ឃចំនួន ៩៩៩អង្គ ដើម្បីសុំសេចក្ដីសុខចម្រើនឲ្យខ្លួនឯង និងប្រជាពលរដ្ឋខ្មែរទាំងអស់ គេចផុតពីជំងឺកាចសាហាវ Coronavirus។
ពិធីនេះ ប្រារព្ធធ្វើនៅនឹងហាង “កាកាសុគីស៊ុប” របស់លោកជំទាវ ផាន់ ម៉ូនីកា ដែលជាអតីតតារាចម្រៀងផលិតកម្មសាន់ដេ។ ពិធីនេះធ្វើក្រោមការផ្ដួចផ្ដើមគំនិតរបស់លោកជំទាវ ម៉ែន ភក្ដី ហុក ឡងឌី ដែលទើបនឹងធ្វើពិធីជួបជុំលោកពូ អ៊ុំ លោកតា ធាក់ស៊ីក្លួជួបជុំពិសាអាហាររួមគ្នា និងចែកទានហើយថ្មីៗ
តាមលោកជំទាវ ផាន់ ម៉ូនីកា ជួសមុខឲ្យលោកជំទាវ ម៉ែន ភក្ដី បានឲ្យដឹងថា ពិធីនេះ ធំជាងពេលណាៗទាំងអស់ ពោលគឺពីពេលមុនៗ ត្បិតតែធ្លាប់ធ្វើជារឿយៗ តែក្នុងទ្រង់ទ្រាយតូចមានព្រះសង្ឃត្រឹម ៣០០-៤០០អង្គប៉ុណ្ណោះ ប៉ុន្តែលើកនេះ គឺមានព្រះសង្ឃជិត ១០០០អង្គ មកពីស្ទើរគ្រប់វត្តក្នុង និងក្បែរខាងរាជធានីតែម្ដង។
ចំពោះគោលបំណងនៃការធ្វើពិធីបុណ្យដ៏ធំនេះ គឺដើម្បីឧទ្ទិសកុសលដល់បុព្វការីជនដែលចែកឋាន និងសុំសេចក្ដីសុខសប្បាយ រកស៊ីមានបាន ហើយមួយវិញទៀត ឥឡូវនេះប្រទេសជាច្រើន រួមទាំងកម្ពុជា បាន និងកំពុងប្រឈមនឹងជំងឺកាចសាហាវ Coronavirus។ ដូច្នេះ លោកជំទាវ ក៏ឆ្លៀតពេលនេះ ធ្វើការបួងសួងឲ្យបងប្អូនប្រជាពលរដ្ឋខ្មែរយើងទាំងអស់បានសុខសប្បាយ និងគេចផុតពីជំងឺ Corona នេះទាំងអស់គ្នាផងដែរ៕
