លោកស្រី អឿន ម៉ូលីកា អតីតតារាចម្រៀង ដែលធ្លាប់មានប្រវត្តិកម្សត់កម្រ ធ្លាប់ដើរសុំផ្ទះគេដើម្បីស្នាក់នៅរាជធានីភ្នំពេញ ពេលនេះលោកស្រី បានក្លាយខ្លួនជាស្ថាបនិក និងជាអគ្គនាយកក្រុមហ៊ុន អិនខេ ម៉ូលីកា ប៊ីយូធីត្រឌីង ខូអិលធីឌី។ នៅថ្ងៃទី០៧ ខែកក្កដា ឆ្នាំ២០២២ ស្អែកនេះ លោកស្រីនឹងអញ្ជើញភ្ញៀវកិត្តិយសចំនួន ១០០តុ ដើម្បីចូលរួមពិធីឡើងគេហដ្ឋានថ្មីរបស់លោកស្រី ដែលមានតម្លៃសរុប ជិតកន្លះលានដុល្លារ នៅខណ្ឌសែនសុខ។
តាមរយៈកិច្ចសម្ភាសន៍ជាមួយសារព័ត៌មានក្នុងស្រុកមួយនៅថ្ងៃពុធនេះ លោកស្រី អឿន ម៉ូលីកា បានបញ្ជាក់ឱ្យដឹងថា វីឡារបស់លោកស្រី និងស្វាមីនេះ បានរស់នៅជិត១ឆ្នាំហើយ ប៉ុន្តែពុំទាន់បានធ្វើពិធីឡើងនោះទេ ដោយសារតែមានបញ្ហាកូវីដ-១៩។ ចំពោះតម្លៃ វីឡានេះ សរុបទាំងការតុបតែងរៀបចំទៀត អាចជិតដល់ ៤០ម៉ឺនដុល្លារ។ លោកស្រី បានបន្ថែមថា កម្មវិធីថ្ងៃស្អែកនេះ ក៏បានភ្ជាប់មកជាមួយនឹងកម្មវិធីខួបកំណើតកូនស្រីអាយុ២ឆ្នាំផងដែរ។
លោកស្រី អឿន ម៉ូលីកា បានបន្ថែមថា កាលពី៥ឆ្នាំមុន លោកស្រីឡើងមកភ្នំពេញ គឺដើម្បីធ្វើជាតារាចម្រៀង និងជាតារាសម្តែង និងពុំមានផ្ទះនៅនោះទេ ហើយធ្លាប់ដើរសុំផ្ទះគេនៅជាមួយ ដោយជួយចេញថ្លៃទឹកនិងថ្លៃភ្លើង។ ទោះយ៉ាងណា មកទល់បច្ចុប្បន្ននេះ ក្រៅពីផ្ទះវីឡា បច្ចុប្បន្នលោកស្រីក៏មានរថយន្តទំនើបៗជាច្រើនគ្រឿងទៀត។
សូមរំឭកថា លោកស្រី អឿន ម៉ូលីកា ហៅចែកា ជាអតីតតារាចម្រៀងប្រចាំផលិតកម្ម Rock។ លោកស្រី បានចូលរោងការជាមួយលោក ហុង មានុណ កាលដើមឆ្នាំ២០២០ ហើយនៅចុងឆ្នាំ២០២០ លោកស្រីក៏សម្រាលបានកូនស្រីម្នាក់ឈ្មោះថា នុណ ច័នម៉ូនីតា៕
