ថវិកាសរុបចំនួន៣លាន៨សែនដុល្លារអាមេរិក នឹងចំណាយប្រើលើការងារបោសសម្អាតគ្រាប់មីនឲ្យអស់នៅក្នុងខេត្តចំនួន៥ រួមមានខេត្តតាកែវ ខេត្តកំពង់ចាម ខេត្តកំពត ខេត្តកំពង់ឆ្នាំង និងខេត្តស្វាយរៀង ។ ពិធីចុះកិច្ចសន្យាលើការងារបោសសម្អាតមីនក្នុងខេត្តទាំង៥ រវាងអាជ្ញាធរមីន និង និងមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានធ្វើឡើងនៅទីស្នាក់ការអាជ្ញាធរមីន នៅពីថ្ងៃទី០២ ខែសីហា ឆ្នាំ២០២២។
បើតាមលោក លី ធុជ ទេសរដ្ឋមន្ត្រីនិងជាអនុប្រធានទី១អាជ្ញាធរមីន បានបញ្ជាក់ថា នៅក្នុងខេត្តចំនួន៥នេះ មានផ្ទៃដីដែលមានមីនសរុបចំនួន៣០៩១ហិកតា ហើយក្រុមការងារមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានចុះពិនិត្យ និងវាយតម្លៃស្ថានភាពចម្ការមីនរួចរាល់ហើយនឹងចាប់ផ្តើមប្រតិបត្តិការពីថ្ងៃចុះកិច្ចសន្យានេះតទៅ។
លោកទេសរដ្ឋមន្រ្តី បានបន្ថែមថា សម្រាប់ខេត្តតាកែវ កំពង់ចាម និងកំពង់ឆ្នាំង នឹងបញ្ចប់ប្រតិបត្តិការដោយបោសសម្អាតមីនអស់ នៅត្រឹមខែធ្នូ ឆ្នាំ២០២២ ខាងមុខ។ ដោយឡែក ខេត្តកំពត និងស្វាយរៀង នឹងបញ្ចប់នៅក្នុងឆ្នាំ២០២៣ ដោយចំការមីនមានទំហំធំ។
គួរបញ្ជាក់ថា ក្រោមគម្រោងសម្តេចតេជោសម្រាប់សកម្មភាពមីន “ផ្តល់ដីសុវត្ថិភាព បង្កើតស្នាមញញឹម” អាជ្ញាធរមីន កាលពីខែកក្កដា កន្លងទៅបានចុះកិច្ចសន្យាជាមួយ មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្រ្គាម (NPMEC)ដើម្បី បោសសម្អាតមីន ឲ្យអស់ក្នុងខេត្តត្បូងឃ្មុំ ដោយប្រើរយៈពេល៦ខែ។ ថវិកាដែលប្រើប្រាស់បោសសម្អាតមីនក្នុងខេត្តត្បូងឃ្មុំ ចំនួនជាង៧៦ម៉ឺនដុល្លារអាមេរិក ។
កម្ពុជាត្រូវការថវិកាប្រមាណ ៩០លានដុល្លារ ដើម្បីបោសសម្អាតមីនដែលនៅសេសសល់លើផ្ទៃដីប្រមាណជិត២ពាន់គីឡូម៉ែត្រក្រឡា ដោយតាមការប៉ាន់ប្រមាណសម្រាប់ការងារបោសសម្អាតមីនក្នុងមួយម៉ែត្រក្រឡា ត្រូវប្រើថវិកាចន្លោះពី៩០០រៀលទៅ១ពាន់រៀល ៕
