កម្ពុជា បានសម្តែងនូវការព្រួយបារម្ភ និងកំពុងយកចិត្តដាក់តាមដានសភាពការណ៍វិវឌ្ឍន៍ថ្មីៗ នៅច្រកសមុទ្រតៃវ៉ាន់ និងស្នើឲ្យគ្រប់ភាគីពាក់ព័ន្ធគោរពកិច្ចព្រមព្រៀងទាំងឡាយដែលត្រូវបានចុះហត្ថលេខារវាងចិន និងសហរដ្ឋអាមេរិក ក្នុងសេចក្តីថ្លែងការណ៍កន្លងមក។
សេចក្តីថ្លែងការណ៍របស់កម្ពុជា ធ្វើឡើងបន្ទាប់ពីប្រធានសភាពសហរដ្ឋអាមេរិក លោកស្រី Nancy Pelosi បានធ្វើដំណើរមកដល់ដីកោះតៃវ៉ាន់ដោយសុវត្ថិភាព នៅវេលាម៉ោង ១០ និង ៤៥ នាទីយប់ (ម៉ោង ៩ និង ៤៥ នាទីនៅកម្ពុជា) តាមរយៈយន្តហោះចំបាំងរបស់អាមេរិកដែលមានលេខ SPAR19។
ដំណើរទស្សនៈកិច្ចលើកដំបូងរបស់លោកស្រី បានធ្វើឲ្យពិភពលោកព្រួយបារម្ភជាខ្លាំង ដ្បិតកន្លងមករដ្ឋាភិបាលចិនបានព្រមានយ៉ាងចាស់ដៃថា អាមេរិកកុំលូកដៃក្នុងទំនាស់ផ្ទៃក្នុងរបស់ខ្លួន ហើយបើសិនជានៅតែព្រហើន នោះសង្គ្រាមអាចផ្ទុះបានគ្រប់ពេល។
សេចក្តីថ្លែងការមួយទំព័រនៅយប់ថ្ងៃទី៣សីហានេះ ក្រសួងការបរទេស និងសហប្រតិបត្តិការអន្តរជាតិ បញ្ជាក់ថា កម្ពុជាប្រកាន់ភ្ជាប់ជានិច្ចនូវ «គោលនយោបាយចិនតែមួយ» ដោយឥតងាករេ ហើយចាត់ទុកបញ្ហានានាពាក់ព័ន្ធនឹងហុងកុង តៃវ៉ាន់ ទីបេ និងស៊ីនជាំង ជាកិច្ចការផ្ទៃក្នុងរបស់ចិន និងជាសិទ្ធិអធិបតេយ្យរបស់ចិន។
សេចក្តីថ្លែងការណ៍ដដែល បានអំពាវនាវឲ្យភាគីពាក់ព័ន្ធស្វះស្វែងរកដំណោះស្រាយប្រកបដោយសន្តិវិធីរក្សាស្ថានភាពដើម និងចៀសវាងបង្កហេតុ ដើម្បីបុព្វហេតុនៃសន្តិភាព ស្ថិរភាព វឌ្ឍនភាព និងវិបុលភាពក្នុងតំបន់ និងពិភពលោក៕
