វេជ្ជបណ្ឌិត ណែនាំឱ្យសម្តេចព្រះមហាអរិយវង្ស បណ្ឌិត ឃី សុវណ្ណរតនា ឱ្យសម្រាកការងារ ការគិតនិងព្រួយបារម្ភច្រើន ខណៈដែលថ្ងៃសៅរ៍នេះ សម្តេចនិមន្តពិនិត្យសុខភាព ឃើញមានឈឺក្រពះពោះវៀន ដូច្នេះវេជ្ជបណ្ឌិតជំនាញបានធ្វើការសុងក្រពះពោះវៀនឃើញរលាកច្រើន។
តាមរយៈទំព័រហ្វេសប៊ុកនារសៀលនេះ សម្តេចព្រះមហាអរិយវង្សបណ្ឌិត ឃី សុវណ្ណរតនា អគ្គលេខាធិការរងថេរសភា អនុប្រធានលេខាធិការដ្ឋានគណៈសង្ឃនាយក និងជាសាកលវិទ្យាធិការរងនៃពុទ្ធិកសាកលវិទ្យាល័យព្រះសីហនុរាជ មានសង្ឃដីកាថា៖ “ខ្ញុំករុណា អាត្មាភាពបានខិតប្រឹងប្រែងបំពេញកិច្ចការដើម្បីព្រះពុទ្ធសាសនា និងសង្គមខ្មែរ ទាំងថ្នាក់ជាតិ និងអន្តរជាតិ មិនខ្លាចនឿយហត់អស់រយៈពេល២០ឆ្នាំមកហើយ ឥឡូវនៅតែបន្ទុកធ្ងន់ដដែល។ ពេទ្យប្រាប់ថា បើមិនសម្រាកទេ ការរលាកកាន់តែរីករាលដាល ហើយជំងឺនឹងកាន់តែធ្ងន់ថែមទៀត”។
វេជ្ជបណ្ឌិតជំនាញ បានបង្ហើបថា ជំងឺរលាកក្រពះរ៉ាំរ៉ៃ កើតឡើងដោយសារស្រទាប់កម្រាលខាងក្នុងរបស់ក្រពះមានការរលាក ហើយរោគសញ្ញា អាចជាអាការៈចុកអួលៗ ឬឈឺជាប់តែម្តង។
បើតាមអ្នកជំនាញ ជំងឺនេះ នឹងបានធូរស្រាលឡើងវិញ បើសិនជាបានទទួលការព្យាបាល និងតាមដានត្រឹមត្រូវ៕
