អនុក្រឹត្យឆ្នាំ២០២១ របស់រដ្ឋាភិបាលបានបញ្ជាក់ពីការផ្តល់ការឧបត្ថម្ភដល់មន្រ្តីថ្នាក់ជាតិ និងថ្នាក់ក្រោមជាតិដែលត្រូវបំពេញបេសសកម្មការងារទៅក្រៅប្រទេស។
ក្នុងអនុក្រឹត្យបានកំណត់ពីការផ្តល់សោហ៊ុយធ្វើដំណើរ តាមចំនួនទឹកប្រាក់កត់ត្រាក្នុងវិក្កយបត្រដោយគិតរួមបញ្ចូលទាំងថ្លៃបង់ពន្ធព្រលានយន្តហោះផងដែរ។
ដោយឡែកសម្រាប់សំបុត្រយន្តហោះ ត្រូវផ្តល់ជូនតាមឋានៈនិងតួនាទីខុសៗគ្នា។
១. សំបុត្រយន្តហោះថ្នាក់ទី១ (First Class) សម្រាប់ឧបនាយករដ្ឋមន្ត្រី ឬអ្នកដែលមានឋានៈនិងបុព្វសិទ្ធិស្មើមុខតំណែងនេះ។
២. សំបុត្រយន្តហោះថ្នាក់ជំនួញ (Business Class)
ក. សម្រាប់ទេសរដ្ឋមន្ត្រី រដ្ឋមន្ត្រី រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការ ឬសមាជិកស្ថាប័នឬអង្គភាពនានាដែលមានឋានៈ និងបុព្វសិទ្ធិស្មើមុខតំណែងនេះ។
ខ. សម្រាប់អនុរដ្ឋលេខាធិការ អគ្គលេខាធិការ អគ្គនាយក អគ្គាធិការ ប្រធានក្រុមប្រឹក្សារាជធានីខេត្ត អភិបាលនៃគណៈអភិបាលរាជធានីខេត្ត ឬអ្នកដែលមានឋានៈនិងបុព្វសិទ្ធិស្មើមុខតំណែងនេះ ដើម្បីចូលរួមប្រជុំផ្លូវការឬកិច្ចចរចាទ្វេភាគី ឬពហុភាគី តាមការប្រគល់សិទ្ធិរបស់ប្រធានស្ថាប័ន និងដែលត្រូវធ្វើដំណើរលើសពីបួនម៉ោង។
ដោយឡែកចំពោះការធ្វើដំណើរផ្សេងពីនេះ ដូចជាការចូលរួមសន្និសីទអន្តរជាតិ សិក្ខាសាលា វគ្គបណ្តុះបណ្តាល ឬទស្សនកិច្ចសិក្សាជាដើម មិនត្រូវបានអនុញ្ញាតឱ្យប្រើប្រាស់សំបុត្រយន្តហោះថ្នាក់ជំនួញទេ។
៣. សំបុត្រយន្តហោះថ្នាក់សន្សំសំចៃ (Economy Class)
ក. សម្រាប់អនុរដ្ឋលេខាធិការ អគ្គលេខាធិការ អគ្គនាយក អគ្គាធិការ ប្រធានក្រុមប្រឹក្សារាជធានីខេត្ត អភិបាលនៃគណៈអភិបាលរាជធានី ខេត្ត ឬអ្នកដែលមានឋានៈ និងបុព្វសិទ្ធិស្មើមុខតំណែងនេះ ដែលត្រូវធ្វើដំណើរចាប់ពីបួនម៉ោងចុះ។
ខ. សម្រាប់អគ្គលេខាធិការរង អគ្គនាយករង អគ្គាធិការរង សមាជិកក្រុមប្រឹក្សារាជធានី ខេត្ត ឬមន្ត្រី រាជការសាធារណៈនៃក្រសួង ស្ថាប័ន អង្គភាពរដ្ឋបាលថ្នាក់ជាតិ និងរដ្ឋបាលថ្នាក់ក្រោមជាតិ ដែលមានឋានៈ និងបុព្វសិទ្ធិស្មើមុខតំណែងនេះចុះក្រោម៕
