លោក សុខ ពុទ្ធិវុធ កើតក្នុងឆ្នាំ១៩៨០ គឺជាកូនប្រុសម្នាក់ក្នុងចំណោមកូន ៥នាក់ របស់សម្តេចវិបុលបញ្ញា សុខ អាន អតីតឧបនាយករដ្ឋមន្រ្តី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី។ សារព័ត៌មានឧកញ៉ាញូស៍ សូមដកស្រង់ការងារសំខាន់ៗមួយចំនួន លោក សុខ ពុទ្ធិវុធ ធ្លាប់បានដឹកនាំ និងកំពុងកាន់កាប់ដែលត្រូវបានប្រកាសជាសាធារណៈ។
លោក សុខ ពុទ្ធិវុធ ធ្លាប់ជាអនុរដ្ឋលេខាធិការក្រសួងប្រៃសណីយ៍និងទូរគមនាគមន៍ ហើយនៅឆ្នាំ២០១៨ ត្រូវបានតែងតាំងជារដ្ឋលេខាធិការ នៃក្រសួងប្រៃសណីយ៍ រហូតដល់សព្វថ្ងៃ។ តំណែងថ្មីលោកគឺជាការបន្ថែមលើតំណែងរបស់លោកបច្ចុប្បន្នដែលជា ប្រធានក្រុមប្រឹក្សាភិបាលទូរគមនាគមន៍កម្ពុជា ដែលត្រូវបានតែងតាំងកាលពីខែមេសា ឆ្នាំ២០១៨ ក្នុងអាណត្តិទី ៥។
នៅក្នុងវិស័យកសិកម្ម លោកមានតួនាទីដ៏សំខាន់ជំរុញឱ្យវិស័យកសិកម្មបន្តដំណើរទៅមុខ ជាពិសេសវិស័យស្រូវអង្ករតែម្តង។ លោក សុខ ពុទ្ធិវុធ ចូលកាន់ដំណែងជាប្រធានសហព័ន្ធស្រូវអង្ករកម្ពុជា ២អាណត្តិជាប់ៗគ្នា រហូតដល់ឆ្នាំ២០១៩ ត្រូវចប់អាណត្តិ ខណៈដែលឧកញ៉ា សុង សារ៉ន ជ្រើសរើសជាប្រធានក្នុងអាណត្តិទី៣។ បច្ចុប្បន្នលោកជាប្រធានកិត្តិសយសហព័ន្ធស្រូវអង្ករ។
នៅឆ្នាំ២០១៤ លោក សុខ ពុទ្ធិវុធ ត្រូវបានជ្រើសតាំងជាប្រធានសហព័ន្ធព័ត៌មានវិទ្យា និងទូរគមនាគមន៍ (ICT Federation) ដែលបង្កើតឡើងដោយអតីតសមាគមពីររួមមាន៖ សមាគមពាណិជ្ជកម្ម ICT និងសមាគមព័ត៌មានវិទ្យាកម្ពុជា។
ទន្ទឹមនឹងនោះ លោក សុខ ពុទ្ធិវុធ ក៏ជាប្រធានសហភាពសហព័ន្ធយុវជនកម្ពុជាខេត្តតាកែវ ហើយជាសមាជិកយុវជនគណបក្សថ្នាក់កណ្តាល នៃគណបក្សប្រជាជនកម្ពុជា និងជាអនុប្រធានទី១ក្រុមការងារថ្នាក់កណ្តាលចុះជួយស្រុកទ្រាំង ខេត្តតាកែវ។
ក្រៅពីនោះ លោក សុខ ពុទ្ធិវុធ ជាអនុប្រធានទី១ គណៈកម្មាធិការអាហារូបករណ៍សិស្ស-និស្សិតក្រីក្រ សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ដែលមានឧត្តមសេនីយ៍ឯក ហ៊ុន ម៉ាណែត ជាប្រធាន ក្នុងគោលបំណងបណ្តុះបណ្តាល និងអភិវឌ្ឍន៍ធនធានមនុស្សនៅក្នុងប្រទេសកម្ពុជា កាត់បន្ថយបន្ទុកគ្រួសារក្នុងការបង់ថ្លៃសិក្សាជាដើម៕
