សាកលវិទ្យាល័យភូមិន្ទភ្នំពេញ ត្រៀមអនុវត្តកម្មវិធីសិក្សាពីវិស្វកម្មបរិស្ថាន ចាប់តាំងពីថ្នាក់បរិញ្ញាបត្រ ដល់អនុបណ្ឌិត ដែលគាំទ្រដោយទីភ្នាក់ងារ KOICA របស់ប្រទេសកូរ៉េ។
បណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា និងជាប្រធានក្រុមប្រឹក្សាភិបាលនៃសាកលវិទ្យាល័យភូមិន្ទភ្នំពេញ បានដឹកនាំប្រតិភូនៃគណៈគ្រប់គ្រងសាកលវិទ្យាល័យភូមិន្ទភ្នំពេញ និងមហាវិទ្យាល័យវិស្វកម្ម និងមហាវិទ្យាល័យសិក្សាអភិវឌ្ឍ ដើម្បីជួបពិភាក្សាជាមួយសមភាគីកូរ៉េ នៅអំឡុងថ្ងៃទី១៧ដល់ទី២២ ខែសីហា ឆ្នាំ២០២២នេះ នៅក្រុងក្វាងជូ នៅប្រទេសកូរ៉េ។
ដំណើរទស្សនកិច្ចលើកនេះ កម្ពុជានិងជួបជាមួយសមភាគីកូរ៉ និងសិក្សាពិនិត្យមន្ទីរពិសោធន៍ ប្រព័ន្ធគ្រប់គ្រងការសិក្សា បណ្ណាល័យនៅក្រុងក្វាងជូ។
សូមជម្រាបថា មហាវិទ្យាល័យវិស្វកម្ម នៃសាកលវិទ្យាល័យភូមិន្ទភ្នំពេញ បានទទួល និងត្រៀមអនុវត្តគម្រោងអភិវឌ្ឍថថ្មីនេះ ដោយមានការគាំទ្រពីទីភ្នាក់ងារ KOICA នៃប្រទេសកូរ៉េ ដោយមានកិច្ចសហការជាមួយវិទ្យាស្ថានវិទ្យាសាស្ត្រនិងបច្ចេកវិទ្យាក្វាងជូ ដើម្បីបង្កើតកម្មវិធីសិក្សាស្តីពី “វិស្វកម្មបរិស្ថាន”។
តាមរយៈគម្រោងអភិវឌ្ឍថ្មីមួយនេះ សាកលវិទ្យាល័យភូមិន្ទភ្នំពេញនឹងមានកម្មវិធីសិក្សាថ្នាក់បរិញ្ញាបត្រ និងអនុបណ្ឌិតជំនាញវិស្វកម្មបរិស្ថាន មន្ទីរពិសោធន៍វិទ្យាសាស្រ្ត ការកសាងសមត្ថភាពសាស្ត្រាចារ្យ ការស្រាវជ្រាវរួមគ្នា ក៏ដូចជាឱកាសសម្រាប់ការផ្លាស់ប្តូរនិស្សិតផងដែរ៕
