គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី (AMK) មានប្រភពកើតចេញមកពីកម្មវិធីឥណទានខ្នាតតូច និងសន្សំរបស់អង្គការ ខុនស៊ើន វើលវ៉ាយ (Concern Worldwide) ដែលបានបង្កើតដំបូងក្នុងដើមឆ្នាំទសវត្សរ៍ ១៩៩០។ នៅឆ្នាំ ២០០២ អង្គការ ខុនស៊ើន វើលវ៉ាយ បានសម្រេចចិត្តបង្កើតគ្រឹះស្ថានមីក្រូហិរញ្ញវត្ថុដាច់ដោយឡែកមួយ ស្ថិតក្រោមឈ្មោះថា អង្គរមីក្រូហិរញ្ញវត្ថុកម្ពុជា (AMK) ដែលបន្ទាប់មកត្រូវបានគេស្គាល់ និងបានចុះបញ្ជីពាណិជ្ជកម្មជា “គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី”។
![](https://www.oknha.news/wp-content/uploads/2022/09/905690_817563261687261_6834986622915829099_o-1024x683.jpg)
AMK មានក្រុមប្រឹក្សាភិបាល ៩ រូប (រួមទាំងអគ្គនាយកផងដែរ) គឺជាអ្នកដែលមានជំនាញទូលំទូលាយក្នុងវិស័យផ្សេងៗដូចជា ហិរញ្ញវត្ថុ បច្ចេកវិទ្យាព័ត៌មានវិទ្យា ហានិភ័យ រតនាគារ សវនកម្ម ច្បាប់ និងប្រតិបត្តិ និងការអភិវឌ្ឍ ក៏ដូចជាបទពិសោធន៍ជាច្រើនក្នុងវិស័យមីក្រូហិរញ្ញវត្ថុ ធនាគារពាណិជ្ជ និងធនាគារវិនិយោគ។ ក្រុមប្រឹក្សាភិបាល គឺអ្នកសម្រេចតែងតាំងប្រធាននាយកប្រតិបត្តិ (CEO) ដែលជាក្បាលម៉ាស៊ីន ក្នុងការដឹកនាំគ្រប់ផ្នែកទាំងអស់ នៃគ្រឹះស្ថានមីក្រូហិរញ្ញវត្ថុ អេ អឹម ខេ ទាំងមូល។
![](https://www.oknha.news/wp-content/uploads/2022/09/298918093_5334230019990088_5242377917486167420_n-1024x576.jpg)
ប្រធាននាយកប្រតិបត្តិ របស់គ្រឹះស្ថានមីក្រូហិរញ្ញវត្ថុ អេ អឹម ខេ បច្ចុប្បន្នគឺជាជនជាតិខ្មែរ មានឈ្មោះថា “គា បូរាណ”។ លោក បូរាណ ត្រូវបានតែងតាំងជាប្រធាននាយកប្រតិបត្តិ គ្រឹះស្ថានមីក្រូហិរញ្ញវត្ថុ អេ អឹម ខេ ក្នុងឆ្នាំ ២០១២ ។ លោកបានចូលបម្រើការនៅ អេ អឹម ខេ អស់រយៈពេលជិត២០ ឆ្នាំមកហើយ ចាប់តាំងពីឆ្នាំ ២០០៤ មក។ លោកបានកាន់តំណែងថ្នាក់ដឹកនាំជាច្រើន ដើម្បីចូលរួមអភិវឌ្ឍគ្រឹះស្ថានដូចជា ប្រធានផ្នែកហិរញ្ញវត្ថុ នាយកប្រតិបត្តិហិរញ្ញវត្ថុ (CFO) និងអនុប្រធាននាយកប្រតិបត្តិ។
![](https://www.oknha.news/wp-content/uploads/2022/09/CEO-1024x600-1.jpg)
មុនពេលដែលលោកចូលរួមជាមួយ អេ អឹម ខេ លោកបានធ្វើការឱ្យគ្រឹះស្ថានមីក្រូហិរញ្ញវត្ថុមួយផ្សេងទៀតក្នុងតួនាទីជានាយកហិរញ្ញវត្ថុ។ លោក បូរាណ បានកាន់តំណេងជាប្រធាននាយកនៅក្នុងស្ថាប័នផ្សេងទៀតដូចជា សមាគមធនាគារកម្ពុជា សមាគមគ្រឹះស្ថានមីក្រូហិរញ្ញវត្ថុកម្ពុជា និងការិយាល័យឥណទានកម្ពុជា (CBC)។ លោក បូរាណ បានបញ្ចប់ការសិក្សាថ្នាក់បរិញ្ញាបត្រហិរញ្ញវត្ថុ និងគណនេយ្យ និងបរិញ្ញាបត្រភាសាអង់គ្លេស។ លោកទទួលបានសញ្ញាបត្រ ជាគណនេយ្យកអាជីព “ACCA” (Association of Chartered Certified Accountants) ជាផ្លូវការ និងបានចូលជាសមាជិកគណនេយ្យករអាជីព “ACCA” ក្នុងឆ្នាំ២០០៨។
![](https://www.oknha.news/wp-content/uploads/2022/09/image.png)
លោក គា បូរាណ ជាអ្នកស្រុកចំការលើ ខេត្តកំពង់ចាម និងធ្លាប់ជាក្មេងវត្ត រស់នៅអាស្រ័យដោយបាយបាត្ររបស់ព្រះសង្ឃ នៅក្នុងវត្តជ្រោយថ្ម ខេត្តកំពង់ចាម អំឡុងពេលលោកសិក្សានៅថ្នាក់វិទ្យាល័យ និងបានស្នាក់នៅវត្តឧណ្ណាលោម ពេលលោកបន្តសិក្សានៅមហាវិទ្យាល័យ ក្នុងរាជធានីភ្នំពេញ។
![](https://www.oknha.news/wp-content/uploads/2022/09/maxresdefault-1024x576.png)
សូមជម្រាបជូនថា គិតត្រឹមឆ្នាំ ២០២១ អេ អឹម ខេ មានអតិថិជនសរុបជិត ១ លាននាក់ ជាមួយនឹងការិយាល័យប្រតិបត្តិការចំនួន ១៥០កន្លែង និងភ្នាក់ងារជិត ៧ ០០០កន្លែង នៅទូទាំងប្រទេស។ អេ អឹម ខេ មានផលិតផល និងសេវាកម្មជាច្រើនកំពុងផ្តល់ជូនអតិថិជន ដូចជាសេវាប្រាក់កម្ចី ប្រាក់សន្សំ សេវាផ្ទេរប្រាក់ក្នុង និងក្រៅប្រទេស សេវាធានារ៉ាប់រងខ្នាតតូច សេវាទូទាត់វិក្កយបត្រ សេវាបើកប្រាក់បៀវត្សរ៍ សេវាបង់រំលស់ ម៉ាស៊ីនដក និងដាក់ប្រាក់ដោយស្វ័យប្រវត្តិ (ATMs/CDMs) ជាពិសេស គឺ AMK Mobile ប្រតិបត្តិការធនាគារលើទូរស័ព្ទដៃអាចធ្វើការទូទាត់ថ្លៃទឹក ភ្លើង សំរាម បញ្ចូលកាតទូរស័ព្ទ និងបង់វិក្កយបត្រថ្លៃទំនិញផ្សេងៗតាមរយៈការស្កេន KHQR វេរលុយទៅមករវាងធនាគារក្នុងស្រុកផ្សេងៗ តាមរយៈប្រព័ន្ធទូទាត់បាគង និងសេវាផ្សេងៗជាច្រើនទៀត៕