រាជរដ្ឋាភិបាល សម្រេចបន្តផ្អាកប្រារព្ធព្រះរាជពិធីបុណ្យអុំទូក សម្រាប់ថ្នាក់ជាតិ ឆ្នាំ២០២២នេះ

រាជរដ្ឋាភិបាលកម្ពុជា សម្រេចផ្អាកការប្រារព្ធព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២២នេះ សម្រាប់ថ្នាក់ជាតិ។ នេះបើយោងលទ្ធផលកិច្ចប្រជុំគណៈរដ្ឋមន្ត្រីនាព្រឹកថ្ងៃទី០៩ ខែកញ្ញានេះ។

សេចក្តីប្រកាសព័ត៌មាន បានឲ្យដឹងថា បើទោះបីព្រះរាជពិធីបុណ្យអុំទូក បណ្តែតប្រទីប និង សំពះ ព្រះខែ អកអំបុក សម្រាប់ថ្នាក់ជាតិ ត្រូវបានផ្អាកយ៉ាងណាក្តី តែការរៀបចំពិធីបុណ្យ អុំទូក កម្សាន្ត សប្បាយនៅតាម បណ្ដារាជធានីខេត្តនានាទូទាំងប្រទេស គឺអាចប្រព្រឹត្តទៅ បានតាម លទ្ធភាពជាក់ស្ដែង ដើម្បី បង្ក ភាព សប្បាយ រីករាយ ជូន ប្រជាពលរដ្ឋ បង្កើន បរិយាកាសទេសចរណ៍ ក៏ដូចជាផ្ដល់ ឱកាស នៃ ការ រកប្រាក់ ចំណូល ដល់បងប្អូនប្រជាពលរដ្ឋ។

គួររំលឹកដែលថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ជាព្រះរាជបវេណីមួយរបស់ខ្មែរ ដែលតែងតែប្រារព្ធធ្វើឡើងជារៀងរាល់ឆ្នាំ តែក្នុងរយៈពេលប៉ុន្មានឆ្នាំចុងក្រោយនេះ ត្រូវបានផ្អាកជាអន្លើដោយយោងទៅលើស្ថានភាពលំបាករបស់សង្គមជាតិ បណ្តាលមកពីជំងឺកូវីដ១៩ និងការជួបគ្រោះទឹកជំនន់ជាដើម៕