ក្នុងលិខិតមួយច្បាប់របស់នាយករដ្ឋមន្ត្រី សម្តេចតេជោ ហ៊ុន សែន កាលពីថ្ងៃទី០៨ ខែតុលា ឆ្នាំ២០២២ បានទៅស្នើប្រធានរដ្ឋសភាជាតិ សម្តេចអគ្គមហាពញាចក្រី ហេង សំរិន ដើម្បីរៀបចំការបោះឆ្នោតផ្តល់សេចក្តីទុកចិត្តលើការបំពេញបន្ថែមសមាសភាពសមាជិករដ្ឋាភិបាលដល់លោក ឌិត ទីណា ធ្វើជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជំនួសលោក វេង សាខុន ត្រូវបានបញ្ឈប់ពីមុខតំណែង។
ក្រោយបញ្ចប់មុខតំណែងលោក វេង សាខុន រាជរដ្ឋាភិបាលកម្ពុជាក៏ចាត់តាំងឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច ជារដ្ឋមន្រ្តីស្តីទីជំនួសរហូតមានការតែងតាំងរដ្ឋមន្រ្តីកសិកម្មថ្មី។
អនាគតរដ្ឋមន្ត្រីវ័យក្មេង លោក ទីណា ធ្លាប់បានទទួលការសិក្សាពីសាលាជាតិជាន់ខ្ពស់ផ្នែករ៉ែ នៅទីក្រុងប៉ារីសប្រទេសបារាំង បច្ចុប្បន្នមានតួនាទីជារដ្ឋលេខាធិការ និងជាអ្នកនាំពាក្យក្រសួងរ៉ែ និងថាមពល ត្រូវបានគេស្គាល់ថាជាកូនរបស់លោក ឌិត មុន្ទី ប្រធានតុលាការកំពូល។
លោក ទីណា ជាបងថ្លៃរដ្ឋមន្រ្តីក្រសួងបរិស្ថាន លោក សាយ សំអាល់ កូនសម្តេចវិបុលសេនាភក្តី សាយ ឈុំ ប្រធានព្រឹទ្ធសភា ភរិយាលោកគឺ លោកស្រី ឌិត និតា។
មានវ័យ ៤៣ឆ្នាំ លោក ឌិត ទីណា ជាបញ្ញវ័នបន្តវេនរបស់គណបក្សប្រជាជនកម្ពុជា បច្ចុប្បន្នអនុប្រធានគណៈពង្រឹងស្រុកស្អាង ប្រធានគណៈពង្រឹងឃុំកោះខ្សាច់ទន្លា និងជាបេក្ខជនតំណាងរាស្ត្រមណ្ឌលកណ្តាល។
ប្រសិនបើមិនមានអ្វីប្រែប្រួលនោះទេ ផុតពីថ្ងៃទី១៣ ខែតុលា ទៅ លោក ឌិត ទីណា កូនប្រុសប្រធានតុលាការកំពូល នឹងក្លាយជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទផ្លូវការ ជំនួស លោក វេង សាខុន ដែលត្រូវបានបញ្ចប់ពីតំណែងកាលពីពេលថ្មីៗនេះ៕
