គិតមកដល់ពេលនេះ ក្រសួងបានចុះ MoU លើគម្រោងសាងសង់ផ្លូវល្បឿនលឿនភ្នំពេញ-បាវិត រួចរាល់ហើយ ដែលអាចឈានទៅធ្វើការបើកការដ្ឋានសាងសង់នាពេលខាងមុខនេះ។ នេះបើតាមការឱ្យដឹងក្នុងជំនួបរវាង លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូន ជាមួយលោក ង្វៀន ហ៊ុយថាំង ឯកអគ្គរដ្ឋទូតវៀតណាម ប្រចាំកម្ពុជា កាលថ្ងៃទី១២ ខែតុលា ឆ្នាំ២០២២។
ទាក់ទងនឹងការតភ្ជាប់ផ្លូវល្បឿនលឿននេះ លោក ស៊ុន ចាន់ថុល បានឱ្យដឹងថា ក្រសួងបានចុះអនុស្សរណៈយោគយល់លើគម្រោងសាងសង់ផ្លូវល្បឿនលឿនភ្នំពេញ-បាវិត រួចរាល់ហើយ ដោយគ្រោងនឹងចុះកិច្ចព្រមព្រៀងសម្បទាន និងការបើកការដ្ឋានសាងសង់នាពេលខាងមុខ។
ជាមួយគ្នានេះ លោកបានបង្ហាញក្តីសង្ឃឹមទៀតថា គម្រោងសាងសង់ផ្លូវល្បឿនលឿនម៉ុកបៃ-ហូជីមិញ នឹងរួចរាល់ដំណាលគ្នាជាមួយនិងគម្រោងផ្លូវល្បឿនលឿនភ្នំពេញ-បាវិត ដើម្បីតភ្ជាប់ក្នុងពេលនោះតែម្តង។
ដោយឡែកចំពោះច្រកទ្វារព្រំដែនព្រៃវល្លិ-ប៊ិញហៀប លោកអះអាងថា ក្រសួងនឹងរៀបចំការដាក់ឱ្យដំណើរការជាផ្លូវការ ក្រោមអធិបតីភាព សម្តេចតេជោនាយករដ្ឋមន្ត្រី និងនាយករដ្ឋមន្រ្តីវៀតណាមថែមទៀត។
ក្រសួងសាធារណការ ធ្លាប់បានបង្ហើបថា គម្រោងនេះអាចនឹងត្រូវចំណាយថវិកាប្រមាណជាង ២ពាន់លានដុល្លារ ហើយនឹងមានប្រវែងសរុប ១៣៥គីឡូម៉ែត្រ កាត់តាមខេត្តកណ្តាល ព្រៃវែង និងស្វាយរៀង មុននឹងទៅដល់ច្រកទ្វារព្រំដែនបាវិត ដែលមានព្រំដែនជាមួយប្រទេសវៀតណាម៕ អត្ថបទ៖ រង្សី
