គម្រោងសាងសង់ស្ពាននឆ្លងទន្លេមេគង្គពីភ្នំពេញ ទៅអរិយក្សត្រ ត្រូវបានរាជរដ្ឋាភិបាលកម្ពុជា និងក្រុមហ៊ុនសាងសង់សម្រេចយកគំរូតាមស្ពានអ្នលឿង ដែលជាប្រភេទស្ពានខ្សែយោងកាប្លិ៍ខ្ពស់គ្មានសសរ។ នេះបើតាមលោក ស៊ុន ចាន់ថុល ថ្លែងក្នុងសន្និសីទសារព័ត៌មាន នៅទីស្តីការគណៈរដ្ឋមន្ត្រី ស្តីពីវឌ្ឍនភាពការងារក្រសួងសាធារណការ និងដឹកជញ្ជូន នាព្រឹកថ្ងៃទី២៧ តុលានេះ។
លោក ស៊ុន ចាន់ថុល បានបញ្ជាក់ថា គម្រោងស្ពាននេះកសាងជាពីរដំណាក់កាល គឺទី១ ពីម្តុំផ្សាររាត្រី ឆ្ពោះទៅកាន់តំបន់ជ្រោយចង្វារ ដំណាក់កាលទី២ ពីតំបន់ជ្រោយចង្វារទៅកាន់តំបន់ស្វាយជ្រុំ ស្រុកខ្សាច់កណ្តាល នៃខេត្តកណ្តាល។
សូមជម្រាបជូនថា គម្រោងសាងសង់ស្ពានមិត្តភាពកម្ពុជា-កូរ៉េខាងត្បូង ឬស្ពានស្វាយជ្រុំ គ្រោងនឹងចាប់ផ្តើមក្នុងឆ្នាំ ២០២៣ ខាងមុខ។ សម្តេចតេជោ ហ៊ុន សែន ធ្លាប់បានបញ្ជាក់ថា មូលហេតុដែលសម្រេចចិត្តធ្វើស្ពានយោងកាប្លិ៍ គ្មានសរសរកណ្ដាល ព្រោះដើម្បីបើកចរាចរណ៍ផ្លូវទឹក សម្រាប់កម្មវិធីប្រណាំងទូក ក៏ដូចជាដើម្បីសោភណភាព។
សម្តេចតេជោបន្តថា ស្ពានមិត្តភាពកម្ពុជា-កូរ៉េនេះ នឹងក្លាយជាស្ពានទំនើបដោយប្រើខ្សែកាប ដើម្បីសម្រួលដល់នាវាចរតាមទន្លេទាំង២ គឺទន្លេសាប និងទន្លេមេគង្គ ហើយនៅពេលស្ពាននេះសាងសង់រួច នឹងអាចទាក់ទាញបានទេសចរណ៍ទាំងក្នុងស្រុក និងបរទេស៕
