ក្រោយដឹកនាំអាស៊ានរយៈពេលមួយឆ្នាំពេញត្រឹមខែវិច្ឆិកានេះ បន្ទាប់ពីទទួលញញួរផ្ទេរតួនាទីពីសម្តេចព្រះចៅស៊ុលតង់ ព្រះមហាក្សត្រ ព្រុយណេ សម្តចតេជោ ហ៊ុន សែន ត្រូវបានមជ្ឈដ្ឋានអន្តរជាតិមើលឃើញថាបាននឹងកំពុងចូលរួមដោះស្រាយបញ្ហាសំខាន់ៗជាច្រើនក្នុងតំបន់ និងពិភពលោក ដូចជាបញ្ហាកូវីដ១៩ សេដ្ឋកិច្ច ទេសចរណ៍ ជម្លោះផ្ទៃក្នុងមីយ៉ាន់ម៉ា និងសេចក្តីថ្លែងការណ៍បញ្ហាសង្គ្រាមរុស្សុី-អ៊ុយក្រែន ពិសេសនោះការជម្រុញប្រទេសទីម័រឡេស្តចូលជាសមាជិកទី១១នៃសហគមន៍អាស៊ាន ជាដើម។
រយៈពេល ៦ថ្ងៃដែលកម្ពុជាជាធ្វើម្ចាស់បានដឹកនាំកំពូលអាស៊ាន និងកិច្ចប្រជុំពាក់ព័ន្ធនានា ហើយថ្ងៃនេះបន្ទាប់ពីបញ្ចប់កិច្ចប្រជុំកំពូលនេះ សម្តេចតេជោ ហ៊ុន សែន នឹងប្រកាសបិទបញ្ចប់កិច្ចប្រជុំកំពូលអាស៊ានលើកទី៤០, ៤១ និងកិច្ចប្រជុំកំពូលពាក់ព័ន្ធ ព្រមទាំងប្រគល់ញញួរផ្ទេរតួនាទីប្រធានអាស៊ាន ប្តូរវេនសម្រាប់ឆ្នាំ២០២៣ ជូនលោក ចូកូ វីដូដូ ប្រធានាធិបតីឥណ្ឌូនេស៊ី ដើម្បីធ្វើជាប្រធានអាស៊ានបន្តពីកម្ពុជា។
សូមបញ្ជាក់ថា ប្រទេសឥណ្ឌូនេស៊ី ត្រូចបានចូលជាសមាជិកអាស៊ាន ឈរលេខរៀងទី៥ នៅថ្ងៃទី០៨ ខែសីហា ឆ្នាំ១៩៦៧។ ឥណ្ឌូនេស៊ី គឺជាប្រទេសមួយស្ថិតនៅប៉ែកខាងត្បូងនៃតំបន់អាស៊ីអាគ្នេយ៍ និងតំបន់មេឡាណេស៊ី ចន្លោះរវាងមហាសមុទ្រឥណ្ឌានិងប៉ាស៊ីហ្វិក។ ប្រទេសនេះមានកោះសរុបប្រមាណ ១៧,០០០ កោះដោយក្នុងនោះមានកោះសំខាន់ៗដូចជា៖ កោះស៊ូម៉ាត្រា ស៊ូឡាវីស៊ី ជ្វា ផ្នែកមួយនៃកោះបរនេអូ និងនូវែលគីនេ។
ទន្ទឹមនឹងនេះ ឥណ្ឌូណេស៊ីគឺជាប្រទេសកោះធំជាងគេបង្អស់ តែបើគិតជាទូទៅ វាជាប្រទេសធំបំផុតទី ១៤ នៅលើពិភពលោកដោយមានក្រឡាផ្ទៃសរុបស្មើនឹង ១,៩០៤,៥៦៩ គម។ ដោយមានប្រជាជនសរុប ២៧០ លាននាក់ ឥណ្ឌូណេស៊ីគឺជាប្រទេសដែលមានចំនួនប្រជាជនច្រើនបំផុតទី ១៤ និងជាប្រទេសមានប្រជាជនកាន់សាសនាឥស្លាមច្រើនបំផុតផងដែរ។
ប្រជាជនឥណ្ឌូណេស៊ីជាងពាក់កណ្តាលមានទីលំនៅលើកោះជ្វា ហើយវាក៏ត្រូវជាកោះដែលមានប្រជាជនរស់នៅច្រើនបំផុតផងដែរបើប្រៀបធៀបទៅនឹងកោះផ្សេងៗនៅលើពិភពលោក៕
