ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ក្នុងរយៈពេលមួយទស្សវត្សរ៍ចុងក្រោយនេះ ទុនវិនិយោគក្នុងវិស័យសំណង់ កម្ពុជាមានកំណើនទៀងទាត់ និងនៅតែបន្តរីកចម្រើនជាលំដាប់។ ជាក់ស្តែង ក្រសួងថា គិតត្រឹម៩ខែ ឆ្នាំ២០២២នេះ គម្រោងសង់អគារកម្ពស់ខ្ពស់នៅកម្ពុជា ចាប់ពី៥ជាន់ឡើង មានជិត១០០គម្រោង។
នៅក្នុងពិធីបើកសន្និបាតបូកសរុបការងារ លើកទី១២ របស់សមាគមអ្នកសាងសង់កម្ពុជា និងបើកការតាំងពិពណ៌ឧស្សាហកម្មសំណង់កម្ពុជា អន្តរជាតិឆ្នាំ២០២២ កាលពីពេលថ្មីៗនេះ ឯកឧត្តម លាង មុនីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ក្នុងរយៈពេលមួយទស្សវត្សរ៍ចុងក្រោយ ទុនវិនិយោគលើវិស័យសំណង់ កម្ពុជាមានកំណើនទៀងទាត់ និងនៅតែបន្តរីកចម្រើនជាលំដាប់ ជាពិសេស ការសាងសង់សំណង់ធំៗខ្ពស់ៗ ដូចជាអគារស្នាក់នៅរួម អគារលក់ទំនិញ ផ្សារទំនើប មជ្ឈមណ្ឌលពាណិជ្ជកម្ម អគារការិយាល័យ សណ្ឋាគារ អគារពហុមុខងារ បុរីលំនៅឋាន ភូមិគ្រឹះ គ្រឹះស្ថានសិក្សា មន្ទីរពេទ្យ ធនាគារ រោងចក្រ ឃ្លាំងជាដើម។
ជាក់ស្តែង ឯកឧត្តមបន្តដូច្នេះថា៖«រយៈពេល៩ខែ ឆ្នាំ២០២២នេះ ក្រសួងរៀបចំដែនដី នគរូបណីយកម្ម និងសំណង់ បានផ្តល់លិខិតអនុញ្ញាតសាងសង់ទូទាំងប្រទេសមាន ៣១៧៦គម្រោង មានទុនវិនិយោគប្រមាណ១៩៦៣លានដុល្លារអាម៉េរិក ក្នុងនោះផ្តល់លិខិតអនុញ្ញាតសាងសង់គម្រោងបណ្តុំលំនៅឋានបុរី មាន២០គម្រោងសង់អគារកម្ពស់ខ្ពស់ចាប់ពី៥ជាន់ឡើង មាន៩៨គម្រោង ស្មើ១០០អគារ»។
យ៉ាងណាក៏ដោយ តាមរយៈពិពណ៌ឧស្សាហកម្មសំណង់កម្ពុជា អន្តរជាតិ ២០២២នេះ ឯកឧត្តម លាង មុនីរិទ្ធ នៅក្នុងពិធីនេះ អំពាវនាវភាគីពាក់ព័ន្ធក្នុងវិស័យសំណង់ទាំងអស់ ត្រូវរួមគ្នាគោរពច្បាប់សំណង់ ក្រមសីលធម៌ និងលិខិតដ្ឋានគតិយុត្តិពាក់ព័ន្ធនានា ដើម្បីធនាបានទាំងសុវត្ថិភាព អនាម័យ បរិស្ថាន សោភ័ណ គុណភាពសំណង់ និងបន្តចូលរួមចំណែកអភិវឌ្ឍន៍សេដ្ឋកិច្ចបន្តរីករចំរើន៕
