វិស័យទេសចរណ៍កម្ពុជានៅប៉ុន្មានឆ្នំាកន្លងមកនេះបានរងផលប៉ះពាល់យ៉ាងធ្ងន់ធ្ងរដោយសារវិបត្តិនៃជំងឺកូវីដ១៩។ ប៉ុន្តែបានងើបឡើងវិញជាសន្សឹមៗបន្ទាប់ពីរាជរដ្ឋាភិបាលធ្វើការគ្រប់គ្រងការរីករាលដាលនៃជំងឺកូវីដ១៩បានល្អ និងបានប្រកាសបើកដំណើរការប្រទេសនិងសេដ្ឋកិច្ចឡើងវិញ ធ្វើឱ្យអ្នករកស៊ីក្នុងវិស័យឧស្សាហកម្មគ្មានផ្សែងមួយនេះផ្តើមមានទំនុកចិត្តកាន់តែខ្ពស់ក្នុងការទទួលបានភ្ញៀវទេសចរនិងប្រាក់ចំណូលនៅឆ្នំា២០២៣ ជាមួយនិងការរំពឹងទុកនៃការហូរចូលនៃចំនួនភ្ញៀវទេសចរមកពីប្រទេសចិន។
បើតាមមគ្គុទេសទេសចរណ៍ម្នាក់នៅខេត្តសៀមរាបបានឱ្យដឹងថានៅក្នុងឆ្នំា២០២២កន្លងមកនេះ លោកបានការផ្តល់ សេវានាំភ្ញៀវបរទេសដែលនិយាយភាសាអង់គ្លេសមានភាពល្អប្រសើរច្រើន តែសម្រាប់ភ្ញៀវទេសចរមកពីប្រទេសចិនមិនទាន់ទទួលបានទេ ដោយសារចិនមិនទានអនុញ្ញាតឱ្យពលរដ្ឋរបស់ខ្លួនចេញដើរកម្សាន្តមកខាងក្រៅប្រទេស។
លោក ធឿន វុឌ្ឍី ជាមគ្គុទេស ទេសចរណ៍ននៅខេត្តសៀមរាបមានប្រសាសន៍ថា «ផ្អែកតាមការជជែកគ្នារវាងអ្នកមគ្គុទេសទេសចរដូចគ្នាកាលឆ្នំា២០២២យើងទទួលបានការផ្តល់ជូនភ្ញៀវបានប្រមាណ៣០ភាគរយហើយចូលមកដល់ឆ្នំា២០២៣នេះយើងរំពឹងថាការផ្តល់សេវានាំភ្ញៀវនឹងកើនលើសឆ្នំា២០២២ ហើយដើម្បីសម្រេចបាននៅកំណើននេះសម្រាប់អ្នកមគ្គុទេសទេសចរណ៍ក៏ដូចជាក្រុមហ៊ុនទេសចរណ៍យើងបានត្រៀមរៀបចំខ្លួនរួចរាល់ ក្នុងការចូលរួមនៅវគ្គបណ្តុះបណ្តាលជាបណ្តើរៗ ធ្វើការស្រាវជ្រាវ ឧស្សាធ្វើការជួបជុំគ្នា និងព្យាយាមមើលព័ត៌មាននៅជុំវិញពិភពលោកពាក់ព័ន្ធនិងភ្ញៀវទេសចរ»។
លោកសង្កត់ធ្ងន់ថា«ចាប់ពីឆ្នំា២០២៣នេះតទៅខ្ញុំយល់ថាអ្នកផ្តល់សេវាទេសចរនៅខេត្តសៀមរាបនឹងមានភាពល្អកាន់តែប្រសើរ ជាក់ស្តែងអូតែលនៅក្នុងខេត្តប្រហែលជាពាក់កណ្តាលនៃចំនួនសរុបបានបើកដំណើរការឡើងវិញ ហើយអូតែលមួយចំនួនដែលមិនទាន់បើកដំណើរការក៏បាននិងកំពុងត្រៀមបើកដំណើរការឡើងវិញផងដែរ»។
តាមលោក ធឿន វុឌ្ឍី ឆ្នំា២០២២កន្លងមកនេះសម្រាប់អ្នកដែលទទួលបានការងារ ឬបានផ្តល់សេវាកម្មទទួលប្រាក់ចំណូលជាសន្សឹមៗគឺបានមកភ្ញៀវបរទេសដែលនិយាយភាសាអង់គ្លេស តែសម្រាប់អ្នកមគ្គុទេសទេសចរណ៍ដែលប្រើភាសាចិននៅមិនទាន់មានការងារធ្វើនៅឡើយទេ។
លោកស្រីឧកញ៉ា ឆាយ ស៊ីវលីន ប្រធានសមាគមទេសចរណ៍កម្ពុជាមានប្រសាសន៍ថាចូលមកដល់ឆ្នំា២០២៣យើងរំពឹងថានឹងទទួលបានភ្ញៀវទេសចរកើនឡើងច្រើនដែលអាចផ្តល់ឱ្យម្ចាស់អាជីវកម្មទេសចរណ៍ ពិសេសនៅក្នុងខេត្តសៀមរាបដែលជាប៉ូលដ៏សំខាន់និងទទួលភ្ញៀវទេសចរចិនដែលជាទីផ្សារធំរបស់ពិភពលោកកំពុងតែបើកប្រទេសឡើងវិញ។
លោកស្រីបញ្ជាក់ថា «ភ្ញៀវទេសចរចិន បានយកកម្ពុជាជាគោលដៅរបស់គាត់សម្រាប់គោលដៅដើរកម្សាន្តបើក្រឡេកទៅមើលបទពិសោធន៍កាលឆ្នំាកន្លងទៅ។ដូចនេះយើងរំពឹងថានឹងទទួលបានពីការហូរចូលនៃភ្ញៀវទេសចិន មកដើរកម្សាន្តនៅកម្ពុជា»។
បើតាមប្រធានសមាគមទេសចរណ៍កម្ពុជាកថា ភ្ញៀវទេសចរចិន ចូលមកកម្សាន្តនៅកម្ពុជា ភាគច្រើនចូលចិត្តទិញឥវ៉ាន់ច្រើនហើយមកជាក្រុមធំៗ។ ដូចនេះអ្នកប្រតិបត្តិការទេសចរណ៍ អ្នកផ្តល់សេវាដល់ភ្ញៀវទេសចរ ទាំងអស់ ពិសេសអ្នកដែលមានឯកទេសជាអ្នកទទួលភ្ញៀវទេសចរចិនរុះរាន់ឡើងនិងត្រៀមនៅផលិតផលទុកផ្តល់ជូនភ្ញៀវទេសចរចិននិងអឺរ៉ុបឃើញថាមានការកើនឡើងខ្ពស់ចាប់ពីឆ្នំា២០២៣នេះតទៅ៕ អត្ថបទ៖ ឧកញ៉ា សារេត
