សហព័ន្ធស្រូវអង្ករកម្ពុជា នៅថ្ងៃទី៣ ខែមករា ឆ្នាំ២០២៣នេះ បានបង្ហាញរបាយការណ៍ថា ក្នុងឆ្នាំ២០២២ កម្ពុជាបាននាំចេញអង្ករទៅកាន់ទីផ្សារអន្តរជាតិ ចំនួនជាង ៦៣ម៉ឺនតោន ទៅកាន់ ៥៩ ប្រទេស។ទន្ទឹមគ្នានេះ ក្នុងរយៈពេលពេញមួយឆ្នាំ នៃឆ្នាំ២០២២ ការនាំចេញអង្កររបស់កម្ពុជា រកចំណូលបានជាង១ពាន់លានដុល្លារអាមេរិកផងដែរ។
សហព័ន្ធស្រូវអង្ករកម្ពុជា បានឱ្យដឹងបន្តថា កម្ពុជា បាននាំចេញអង្ករទៅកាន់ទីផ្សារអន្តរជាតិ បានចំនួន ៦៣៧ ០០៤ តោន និងនាំចេញស្រូវបានចំនួន ៣ ៤៦៧ ៨៨៦ តោន ដលគិតជាទឹកប្រាក់ប៉ាន់ស្មានសរុបបានចំនួនជាង ១ ២៥៥ លានដុល្លារសហរដ្ឋអាមេរិក។
ក្នុងនោះ ក្នុងរយៈពេល ១២ខែ នៃឆ្នាំ២០២២ ប្រទេសកម្ពុជា តាមរយៈក្រុមហ៊ុននាំចេញអង្ករចំនួន ៦១ បាននាំចេញអង្ករទៅកាន់ទីផ្សារអន្តរជាតិចំនួន ៥៩ប្រទេស ដែលក្នុងនោះ ប្រទេសចិន រួមទាំងតំបន់ ស្វយ័តហុងកុង ម៉ាកាវ បានចំនួន ២៨៨ ៨៣០ តោន ឬស្មើនឹង ៤៥% ប្រទេសនៅទ្វីបអឺរ៉ុបចំនួន ២៥ បានបរិមាណសរុបចំនួន ២២១ ៥០៤ តោន ឬស្មើនឹង ៣៥%ប្រទេសសមាជិកអាស៊ានចំនួន ៤ បានបរិមាណសរុបចំនួន ៦៤ ៧៣៣ តោន ឬស្មើនឹង ១០% និងបណ្តាគោលដៅផ្សេងៗ នៅអាហ្វ្រិក អាមេរិក អូស្ត្រាលី រុស្ស៊ី អ៊ុយក្រែន ។ល។ ចំនួន ២៧ ប្រទេស និងដែនកោះបានបរិមាណសរុបចំនួន ៦១ ៩៣៧ តោន ឬស្មើនឹង ១០% នៃការនាំចេញសរុបចំនួន ៦៣៧ ០០៤តោន ដែលមាន តម្លៃ សរុបចំនួន ៤១៨.២៩ លានដុល្លារសហរដ្ឋអាមេរិក។
លើសពីនេះ កម្ពុជា បាននាំចេញអង្ករក្រអូបប្រណិតបានចំនួន២៧៧ ៧៣៩ តោ ឬស្មើនឹង ៤៤% អង្ករសែនក្រអូប បានចំនួន ១៧៩០៧០ តោន ឬស្មើនឹង ២៨% អង្ករសបានចំនួន ១៥៣ ៤២៨ តោន ឬស្មើនឹង ២៤% អង្ករចំហុយបានចំនួន ១៥ ៧៨១ តោន ឬស្មើនឹង ២% អង្ករសរីរាង្គបានចំនួន ១០ ៩៦៣ តោន ឬជិត ២% និងអង្ករដំណើបចំនួន ២៣តោន។
គួរបញ្ជាក់ថា សម្រាប់ការនាំចេញស្រូវទៅកាន់ប្រទេសវៀតណាមវិញ កម្ពុជាបាននាំចេញក្នុងចំនួន ៣៤៧៧ ៨៨៦ តោន ដែលគិតជាទឹកប្រាក់ចំនួនប្រមាណជា ៨៤១០៩ លានដុល្លារសហរដ្ឋអាមេរិកផងដែរ៕
អត្ថបទ៖ រង្សី
