ធនាគារជាតិនៃកម្ពុជា បានបង្ហាញការរំពឹងថា វិស័យសំខាន់ៗចំនួន៣នឹងគាំទ្រ និងរុញច្រានដល់កំណើនសេដ្ឋកិច្ចកម្ពុជា ឆ្នាំ២០២៣ ខណៈមន្ត្រីរាជរដ្ឋាភិបាល ព្យាករណ៍ថា សេដ្ឋកិច្ចកម្ពុជានឹងសម្រេចបានអត្រាកំណើនក្នុងរង្វង់៦ភាគរយ នៅឆ្នាំ២០២៣ខាងមុខ។ ទន្ទឹមគ្នានេះ ធនាគារជាតិ ក៏បានបង្ហាញពីកត្តាអំណោយផល និងកត្តាហានិភ័យ ដល់កំណើនសេដ្ឋកិច្ចកម្ពុជាឆ្នាំ២០២៣ផងដែរ
នេះសេចក្តីសង្ខេបអំពីរបាយការណ៍លទ្ធផលការងារប្រចាំឆ្នាំ២០២២ និងទិសដៅការងារឆ្នាំ២០២៣ របស់ធនាគារជាតិនៃកម្ពុជា ឧទ្ទេសនាមដោយ លោកជំទាវបណ្ឌិត ជា សិរី អគ្គនាយកបច្ចេកទេស និង លោក ឃូ វុឍ្ឍី អគ្គនាយករងបច្ចេកទេស និងជាប្រធាននាយកដ្ឋានស្រាវជ្រាវសេដ្ឋកិច្ចនិងសហប្រតិបត្តិការអន្តរជាតិ កាលបីថ្ងៃទី១៩ ខែមករា។
ក្នុងនោះ ធនាគារជាតិនៃកម្ពុជា ក៏បានឱ្យទៀតថា កត្តាអំណោយផលនិងហានិភ័យចំពោះកំណើនសេដ្ឋកិច្ចកម្ពុជាដូចខាងក្រោម៖
១.កត្តាអំណោយផលរួមមាន៖ ការកើនឡើងវិញនៃការវិនិយោគក្នុងតំបន់,មានទីតាំងភូមិសាស្ត្រនៅចំកណ្តាលអាស៊ាន, ការចូលជាធរមាននៃកិច្ចព្រមព្រៀង RCEP និងកិច្ចព្រមព្រៀងទ្វេភាគី, ការកើនឡើងការវិនិយោគក្នុងវិស័យកសិ-ឧស្សាហកម្ម, លទ្ធភាពខ្ពស់នៃវិស័យធនាគារក្នុងការឆ្លើយតបនឹង តម្រូវការហិរញ្ញប្បទានក្នុងនិងក្រោយពេលមានវិបត្តិ, សេដ្ឋកិច្ចមានភាពបើកទូលាយ និងសមាហរណកម្មខ្ពស់,ស្ថិរភាពនយោបាយម៉ាក្រូសេដ្ឋកិច្ច និងហិរញ្ញវត្ថុ និងកត្តាភាគលាភប្រជាសាស្ត្រ។
២.ហានិភ័យនិងបញ្ហាប្រឈមរួមមាន៖ កំណើនទាបជាងការរំពឹងទុក នៃសេដ្ឋកិច្ចពិភពលោក និងតំបន់ ជាពិសេសប្រទេសអឺរ៉ុប និងចិន,ការកើនឡើងអតិផរណាដែលនឹង ប៉ះពាល់ដល់ជីវភាពរបស់ប្រជាពលរដ្ឋលំហូរចេញនៃមូលធនពីប្រទេសកំពុងលូតលាស់ និងកំពុងអភិវឌ្ឍន៍ ដោយសារការរឹតត្បិតស្ថានភាព ទីផ្សារហិរញ្ញវត្ថុអន្តរជាតិ, ការប្រែប្រួលអាកាសធាតុដែលអាចបន្ថយកំណើនក្នុង វិស័យកសិកម្ម, ភាពមិនច្បាស់លាស់នៃការវិវត្តជំងឺកូដ-១៩,ឧក្រិដ្ឋកម្មសាយប័រជាដើម។
គួរបញ្ជាក់ថា សេចក្តីសង្ខេបអំពីរបាយការណ៍លទ្ធផលការងារប្រចាំឆ្នាំ២០២២ និងទិសដៅការងារឆ្នាំ២០២៣ របស់ធនាគារជាតិនៃកម្ពុជា បានឱ្យដឹងថា បញ្ហាប្រឈមរបស់សេដ្ឋកិច្ចពិភពលោកឆ្នាំ២០២៣ ការអូសបន្លាយសង្គ្រាមរុស្ស៊ី-អ៊ុយក្រែន ដែលអាចបន្តប៉ះពាល់ដល់ខ្សែច្រវាក់ផ្គត់ផ្គង់សកល និងបន្តដាក់សម្ពាធលើអតិផរណា, គ្រោះមហន្តរាយធម្មជាតិ ដែលបណ្ដាលមកពីការប្រែប្រួលអាកាសធាតុ,បញ្ហាដក់សល់ពីវិបត្តិជំងឺកូវីដ-១៩ ដូចជា ការកើនឡើងបំណុល សាធារណៈនិងឯកជនការដំឡើងអត្រាការប្រាក់គោលរបស់ធនាគារកណ្ដាលអាមេរិកបន្ថែមទៀត ដែលធ្វើឱ្យលំហូរមូលធនចញពីប្រទេសកំពុងលូតលាស់ និងកំពុងអភិវឌ្ឍន៍,ការបំប្លែងមេរោគកូវីដ-១៩ ដែលអាចនាំឱ្យមានការអនុវត្តវិធានការតឹងរ៉ឹង និងបិទខ្ទប់ឡើងវិញ៕ អត្ថបទ៖ពិសី
