លោក ឃួង ស្រេង ត្រូវបានព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ ត្រាស់បង្គាប់តែងតាំងជាទីប្រឹក្សាផ្ទាល់សម្តេចតេជោ ហ៊ុន សែន មានឋានៈស្មើរដ្ឋមន្ត្រី បន្ថែមលើមុខងារបច្ចុប្បន្ន តាមរយៈព្រះរាជក្រឹត្យលេខ នស/រកត/០១២៣/១៤៩ ចុះថ្ងៃទី២៥ ខែមករា ឆ្នាំ២០២៣នេះ។
លោក ឃួង ស្រេង បច្ចុប្បន្នជាអភិបាលរាជធានីភ្នំពេញ ត្រូវបានតែងតាំងកាលពីឆ្នាំ២០១៧ ជំនួសលោក ប៉ា សុជាតិវង្ស។ នៅឆ្នាំ២០២១ លោកក៏ទទួលបានការតែងតាំងជាថ្មីជាអភិបាលនៃគណៈអភិបាលរាជធានីភ្នំពេញសម្រាប់អាណត្តិទី២។
លោក ឃួង ស្រេង ត្រូវបានគេស្គាល់ថាជាមនុស្សជំនិតនិងជាទំពាំងដែលលោក ជា សុផារ៉ា ឧបនាយករដ្ឋមន្រ្តី និងរដ្ឋមន្រ្តីក្រសួងដែនដីនគរោបនីយកម្មនិងសំណង់ បានបណ្តុះបណ្តាលដោយផ្ទាល់ដៃ អំឡុងកាន់តំណែងជាអភិបាលរាជធានីភ្នំពេញអំឡុងឆ្នាំ១៩៩៩ ដល់ឆ្នាំ២០០៣។
លោកបានបញ្ចប់ថ្នាក់អនុបណ្ឌិតផ្នែកវិទ្យាសាស្ត្រនយោបាយ មុនឡើងជាអភិបាលរាជធានីភ្នំពេញ។ លោក ធ្លាប់បម្រើការងារក្នុងក្របខណ្ឌជាមន្ត្រីសាលាខណ្ឌទួលគោកនៅឆ្នាំ២០០៨ និងពីឆ្នាំ១៩៩៩-២០០៨ ជាអភិបាលរងខណ្ឌទួលគោក។ ឆ្នាំ២០០៨-២០០៩ តែងតាំងជាអនុរដ្ឋលេខាធិការក្រសួងពាណិជ្ជកម្ម។ ចាប់ពីឆ្នាំ២០០៩-២០១២ ជាអភិបាលខណ្ឌសែនសុខ និងឆ្នាំ២០១២-២០១៧ ជាអភិបាលរងរាជធានីភ្នំពេញ។
សូមជម្រាបជូនថា គិតតាមលេខរៀងពីឆ្នាំ១៩៤១ មក លោក ឃួង ស្រេងគឺជាឥស្សរជនទី ១៨ ដែលឡើងគ្រប់គ្រងតំណែងជាអភិបាលរាជធានីភ្នំពេញ៕
