អ្នកជំនាញបានព្យាករណ៍ថា នៅក្នុងឆ្នាំ២០២៣នេះ វិស័យសេវាកម្មនឹងបន្តងើបឡើងក្នុងអត្រាប្រមាណ៦,៦ភាគរយ ពីកំណើន ៤,៣ភាគរយ ក្នុងឆ្នាំ២០២២ ដោយសារការបន្តងើបឡើងនូវសកម្មភាពសេដ្ឋកិច្ចក្នុងស្រុក ជាពិសេសអនុវិស័យសណ្ឋាគារ ភោជនីយដ្ឋាន និងវិស័យគាំទ្រទេសចរណ៍ផ្សេងៗទៀត។ នេះបើយោងតាមសេចក្តីព្រាងច្បាប់ថវិកាសង្ខេបឆ្នាំ២០២៣ របស់ក្រសួងសេដ្ឋកិច្ច និងហិរញ្ញវត្ថុ។
បើតាមការព្យាករណ៍បានឱ្យដឹងថា ការងើបឡើងក្នុងវិស័យសេវាកម្មនេះ រួមមានអនុវិស័យសណ្ឋាគារ និងភោជនីយដ្ឋាន ត្រូវបានរំពឹងនឹងបន្តនិន្នាការងើបឡើងវិញ ដោយសារការផ្អែកលើការកើនឡើងនៃភ្ញៀវទេសចរអន្តរជាតិ ស្របពេលដែលភ្ញៀវទេចរជាតិ ក៏ត្រូវបានរំពឹងថានឹងបន្តងើបឡើងជាមួយនឹងសន្ទុះលឿនជាងទេសចរណ៍អន្តរជាតិ។ នេះដោយសារ តែការដកចេញនូវរបាំងធ្វើដំណើរផ្សេងៗ និងការវិលត្រឡប់រកប្រក្រតីភាពវិញនៃសង្គម-សេដ្ឋកិច្ច។
ជាមួយគ្នានោះ អនុវិស័យលក់រាយ-ដុំ ត្រូវបានរំពឹងថា នឹងបន្តកើនឡើងផងដែរ ដោយសារការរំពឹងទុកនូវចំណូលរបស់ប្រជាជន និងការចាយវាយក្នុងស្រុក គួបផ្សំនឹងការផ្លាស់ប្តូរឥរិយាបថអាជីវកម្ម ក៏ដូចជាការទិញលក់បែបប្រពៃណី ជំនួសដោយការប្រើប្រាស់ឌីជីថល ដែលការណ៍នេះនឹងជំរុញបន្ថែមទៀតដល់សកម្មភាពប្រើប្រាស់ក្នុងស្រុកជារួម។ ចំណែកឯ អនុវិស័យដឹកជញ្ជូន និងគមនាគមន៍វិញ ក៏មានការបន្តងើបឡើង ដែលគាំទ្រដោយការបន្តកើនឡើងនៃការដឹកជញ្ជូនបម្រើឱ្យវិស័យទេសចរណ៍ និងពាណិជ្ជកម្ម។ នេះ ដោយសារការបន្តកើនឡើងនូវការប្រើប្រាស់អិនធឺណេត និងឌីជីថលក្នុងអាជីវកម្ម ជីវភាពប្រចាំថ្ងៃ ក្នុងគន្លងប្រក្រតីភាពថ្មី។
ដោយឡែក អនុវិស័យអចលនទ្រព្យ បានរំពឹងថា បន្តនិន្នាការកើនឡើង ប៉ុន្តែក្នុងល្បឿនយឺត ដោយសារការរំពឹងទុកលើការបន្តងើបឡើងយឺតនៃលំហូរទុនវិនិយោគពីបរទេស និងកំណើនទាបនៃសកម្មភាពទិញ-លក់អចលនទ្រព្យជារួម។
បើតាមរបាយការណ៍ ក៏បានគូសបញ្ជាក់ថា ការដាក់ចេញ និងអនុវត្តនូវ «ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥»នឹងបង្កើនការវិនិយោគលើហេដ្ឋរចនាសម្ព័ន្ធឌីជីថល ព្រមទាំងនឹងលើកកម្ពស់ការប្រើប្រាស់ទំនិញ និងសេវាឌីជីថលនៅកម្ពុជា ផងដែរ៕
