ព្រឹកថ្ងៃទី ១៦ មិថុនា ២០១៩នេះ តារា១ក្រុមបានចូលរួមដឹកនាំដាំកូនឈើ ចំនួន ២ ៥០០ដើម នៅវាលទួលឬស្សីរំដេង ស្ថិតក្នុងភូមិថ្មី ឃុំ ស្វាយជ្រុំ ស្រុកមេសាង ខេត្តព្រៃវែង ត្រូវដាំ ក្រោមវត្តមានឯកឧត្ដម ស សុខា ។
អ្នកសិល្បៈដែលបានទៅចូលរួមសកម្មភាពខាងលើមានដូចជា នាយពែកមី លោក តាំង គីមសួ អ្នកចន ច័ន្ទលក្ខិណា លោក ហេង ឡុង លោក សាយ សៀរ៉ា លោក ហម ឆរ៉ា កញ្ញា ហ្វីយ៉ា ជាដើម ដែលពួកគេកន្លងមកតែងតែចូលរួមជាមួយកិច្ចការសង្គមស្ទើរគ្រប់សកម្មភាពទាំងអស់។
ឯកឧត្ដម ស សុខា បានចាត់ទុកថា សកម្មភាពដាំកូនឈើនាពេលនេះ គឺជាការចូលរួមចំណែកក្នុងការការពារ ថែរក្សា និងអភិរក្សសម្បត្តិធម្មជាតិព្រៃឈើ នៃព្រះរាជាណាចក្រកម្ពុជាយើង ក៏ដូចជាចូលរួមបង្កើននូវបរិស្ថានល្អបរិសុទ្ធ សំរាប់ជីវិតមនុស្ស សត្វ នៅលើផែនដីទាំងមូល ។
ជាមួយនឹងសកម្មភាពនេះ ឯកឧត្ដម ស សុខា សូមអរគុណក្រុមការងារសម្របសម្រួល គាំទ្រ ឧបត្ថម្ភសកម្មភាពយុវជនខេត្តព្រៃវែង អាជ្ញាធរស្រុកមេសាង បងប្អូនប្រជាពលរដ្ឋ យុវជន ស.ស.យ.ក. ស្រុក យុវជនកាកបាទក្រហម យុវជនកាយរឹទ្ធិ សិស្សានុសិស្ស ជាពិសេសបងប្អូនក្រុមតារាៗ ដែលបានរៀបចំ និងចូលរួមកម្មវិធីដាំកូនឈើនាព្រឹកនេះ ។
