ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានបន្តដាស់តឿន និងក្រើនរម្លឹកដល់ប្រជាពលរដ្ឋឲ្យយកចិត្តទុកដាក់ថែទាំសុខភាព ដើម្បីចៀសវាងការឆ្លងរោគកូវីដ-១៩ ទោះបីជាអត្រាឆ្លងនៃជំងឺដ៏កាចសាហាវនេះ ត្រូវបានធ្លាក់ចុះនៅក្នុងប្រទេសកម្ពុជាក្តី។
សម្ដេចតេជោបានសរសេរនៅលើផេកផ្លូវការរបស់សម្តេចថា មកទល់ពេលនេះទាំងកម្ពុជា និងពិភពលោក គឺកំពុងរួមដៃគ្នាប្រយុទ្ធប្រឆាំងនឹងជំងឺកូវីដ-១៩ ហើយថ្នាំព្យាបាលជំងឺនេះ ក៏មិនទាន់រកឃើញនៅឡើយដែរ។ ដូច្នេះជំងឺដ៏កាចសាហាវនេះ នៅតែបន្តយាយីអាយុជីវិតពលរដ្ឋនៅទូទាំងពិភពលោក ដែលប្រទេសមួយចំនួនធំ កំពុងបិទប្រទេសនៅឡើយ។
សម្ដេចតេជោនាយករដ្ឋមន្ត្រីគូសបញ្ជាក់បន្ថែមថា ទោះបីនៅក្នុងរាជធានីភ្នំពេញក្តី ឬនៅតាមបណ្តាខេត្ត ក្រុង ឬជនបទក្តី សូមបងប្អូនទាំងអស់ បន្តពាក់ម៉ាស់ ឬក្រមាការពារ និងដុសលាងសម្អាតដៃដោយទឹកអាល់កុល ឬទឹកជែលសម្អាតកម្ចាត់មេរោគនឹងបាក់តេរីផ្សេងៗ ឱ្យបានជាប្រចាំ ចៀសវាងការចម្លងរោគពីម្នាក់ទៅម្នាក់ ដែលនាំមកនូវការសោកស្តាយអស់មួយជីវិត។
ជាមួយគ្នានេះ សូមរាយការណ៍មកក្រសួងសុខាភិបាលជាបន្ទាន់ក្នុងករណីមានការសង្ស័យណាមួយតាមរយៈលេខ ១១៥៕
