ទំព័រហ្វេសបុកផ្លូវការ Kem Sovanna Photography បានឲ្យដឹងថា ប្រាសាទបេងមាលា មានទីតាំងស្ថិតនៅភូមិបេងមាលា ស្រុកស្វាយលើ ខេត្តសៀមរាប។ ប្រាសាទនេះ ស្ថិតនៅខាងកើតជើងភ្នំគូលែន និងខាងកើតក្រុងសៀមរាប លើចម្ងាយផ្លូវប្រហែល៧៧គីឡូម៉ែត្រ។
ប្រាសាទនេះ មានរចនាប័ទ្ម ដូចទៅនឹងប្តរាតសាទអង្គរវត្តដូច្នោះដែរដែលអាចឲ្យគេដឹងបានថា ជាប្រាសាទ ដែលកសាងក្នុងរាជ្យព្រះបាទសូរ្យវរ្ម័នទី២ នៅចុងសតវត្សរ៍ទី១១ ដើមសតវត្សរ៍ទី១២ ឧទ្ទិសដល់ព្រហ្មញ្ញសាសនា។ ទោះជាមានភាពប្រហាក់ប្រហែលទៅនឹងប្រាសាទអង្គរវត្តក៏ពិតមែន ប៉ុន្តែគេមិនអាចដឹងកាលបរិច្ចេទពិតប្រាកដនៃឆ្នាំដែលកសាងប្រាសាទបេងមាលាឡើយ ព្រោះហេតុថាគ្មានសិលាចារឹកបញ្ជាក់។
បើសរុបទំហំដែលត្រូវការពារ ក្នុងអនុក្រឹត្យរបស់រាជរដ្ឋាភិបាល នៅតំបន់ប្រាសាទបេងមាលា មានទំហំដល់ទៅ៨៦៩ហិកតា។ នៅខាងកើតប្រាសាទនេះ មានបារាយណ៍ដ៏ធំមួយមានបណ្តោយ១៦០០ម៉ែត្រនិងទទឹង៨០០ម៉ែត្រ។តួប្រាសាទមានទំហំបណ្តោយ១០៧៦ម៉ែត្រទទឹង៩១៣ម៉ែត្រ។
តនៅក្បែរប្រាសាទនេះ មានប្រាសាទតូចៗជាច្រើនទៀត មានដូចជាប្រាសាទជ្រៃ និងប្រាសាទកងភ្លក់ជាដើម ចំណែកខាងជើងឆៀងខាងលិច មានតំបន់មួយដែលគេឲ្យឈ្មោះថា តំបន់អូរថ្មដាប់ដែលជាកន្លែងដាប់ថ្មបុរាណ សម្រាប់បម្រើការសាងសង់ប្រាសាទនៅតំបន់អង្គរទាំងមូល។
សូមបញ្ជាក់ដែរថា លោក គឹម សុវណ្ណា គឺជាថតរូបអាជីពដ៏ល្បីនៅកម្ពុជា ដែលរូបថតលោកមួយៗ មានការច្នៃប្រឌិដ្ឋ ទេពកោសល្យ និងប្រកបដោយអត្ថន័យជ្រៅក្នុងមួយសន្លឹកៗ។ ពេលថ្មីៗនេះ លោក សុវណ្ណា បានផ្តិតរូបភាពក្មេងប្រុសម្នាក់យកកង់កញ្ចាស់ទៅប្រណាំងជាមួយកង់ទំនើបៗ ធ្វើឲ្យមហាជនកោតសរសើរ ហើយនិងមានការភ្ញាក់ផ្អើលជាខ្លាំង នូវទឹកដៃដ៏ចំណានរបស់លោក បានធ្វើឲ្យក្មេងប្រុសកម្សត់ម្នាក់ មានភាពល្បីល្បាញពេញបណ្តាញសង្គម ហើយប្រែវាសនាកុមារកម្សត់មកជាសំណាងបានមួយពព្រិចភ្នែកទៀតផង។
រូបភាពដោយ អ្នកថតរូបល្អឯក Sovanna Kem
