ប្រមុខរដ្ឋាភិបាល សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានឲ្យដឹងថា ទាក់ទងនឹងការប្រជុំអាស៊ាន-អាមេរិក ដែលថ្មីៗនេះ ប្រធានាធិបតែអាមេរិកបានពន្យាពេលនៃកិច្ចប្រជុំពិសេសកំពូលអាស៊ាន-អាមេរិក ហើយក្នុងនោះក៏មានការវិភាគ និងលើកឡើងនូវមតិខុសៗគ្នា តែហេតុផលយ៉ាងណានោះ មានតែអាមេរិកខ្លួនឯងទេជាអ្នកដឹង។
ការលើកឡើងពីសំណាកសម្តេច តេជោ ហ៊ុន សែន នាពេលនេះ ត្រូវបានធ្វើឡើងគ្រាដែលសម្តេចបានអញ្ជើញជាអធិបតីដ៏ខ្ពង់ខ្ពស់ប្រគល់សញ្ញាបត្រជូននិស្សិតសាកលវិទ្យាល័យអាស៊ីអឺរ៉ុប ចំនួន១,៥៨៩នាក់ កាលព្រឹកថ្ងៃទី២ ខែមីនា ឆ្នាំ២០២០នេះ ។
នាឪកាសនោះ សម្តេចតេជោ បានឲ្យដឹងបន្តទៀតថា មានមតិខ្លះលើកឡើងថា អាមេរិកបានចាត់ទុករឿងជំងឺកូវិត១៩ គឺជារឿងសំខាន់ ក្នុងការពន្យានៃកិច្ចប្រជុំនេះ និងជាការប្រយុទ្ធប្រឆាំងទប់ស្កាត់ជំងឺនេះ។ ក៏ប៉ុន្តែក៏មានការលើកឡើងថា អាមេរិកពន្យាការប្រជុំដោយសារមេដឹកនាំអាស៊ានមួយចំនួនមិនទៅចូលរួមក្នុងកិច្ចប្រជុំនោះដូចជាប្រធាធិបតីនៃប្រទេសហ្វីលីពីន , នាយករដ្ឋមន្ត្រីម៉ាឡេស៊ី និងនាយករដ្ឋមន្ត្រីឥណ្ឌូនេស៊ី ដែលប្រទេសទាំង៣នេះអាចតំណាងជាងពាក់កណ្តាលនៃប្រជាពលរដ្ឋអាស៊ានទៅហើយ។ នេះជាការបន្ថែមរបស់សម្តេច ហ៊ុន សែន។
យ៉ាងណា សម្តេចតេជោ ហ៊ុន សែន បានសង្កត់ធ្ងន់ទៀតថា កន្លងមកប្រធានាធិបតីអាមេរិកក៏បានអវត្តមានក្នុងកិច្ចប្រជុំអាស៊ានចំនួន០៣ដងរួចមកហើយ ដោយបានអោយតំណាងរបស់ខ្លួនទៅជំនួស។ ដោយសម្តេចតេជោនាយករដ្ឋមន្ត្រីកម្ពុជាគិតថា ហេតុផលទី១ជាមូលហេតុចម្បងដែលអាមេរិកសម្រេចពន្យានៃកិច្ចប្រជុំដ៏សំខាន់នេះ គឺការប្រយុទ្ធប្រឆាំងជំងឺកូរ៉ូណា មិនមែនអាមេរិកមិនយកចិត្តទុកដាក់ជាមួយនឹងប្រទេសអាស៊ាននោះទេ។
គួររម្លឹកដែរថា ពាក់ព័ន្ធនឹងកិច្ចប្រជុំអាស៊ាន-អាមេរិកនេះដែរ លោកប្រធានាធិបតីអាមេរិក ដូណាល់ ត្រាំ បានអញ្ជើញក្រុមមេដឹកនាំតំបន់អាស៊ី អាគ្នេយ៍ចំនួន ១០ប្រទេស រួមទាំងសម្តេច នាយករដ្ឋមន្ត្រី ហ៊ុន សែន នៃប្រទេសកម្ពុជា ដែលជាសមាជិកអាស៊ានមួយក្នុងចំណោម១០ប្រទេសផងដែរ ដើម្បីចូលរួមក្នុងកិច្ច ប្រជុំពិសេសនេះ គឺមួយផ្នែកដោយសារលោក ត្រាំ មិនបានចូលរួមផ្ទាល់ក្នុងកិច្ចប្រជុំ កំពូលនេះនៅទីក្រុងបាងកកប្រទេសថៃ កាលពីដើមខែវិច្ឆិកា ឆ្នាំ២០១៩កន្លងទៅ។
យ៉ាងណា ការពន្យាពេលកិច្ចប្រជុំនេះ ក្រោមហេតុផលដោយសារមេរោគកូរ៉ូណា ត្រូវគេដឹងថា នឹងរង់ចាំការកំណត់ជាថ្មីពីលោកប្រធានាធិបតី ត្រាំ នាពេលខាងមុខទៀត៕ អត្ថបទ៖ សិរីកា
